Атырау облысында бір отбасының төрт мүшесін өлтірді деп айыпталған Сұлтан Сарсемалиевке қатысты сот процесінде тараптардың жарыссөзі басталды. Мемлекеттік айыптаушы соттан айыпталушыны кінәлі деп танып, оған өмір бойына бас бостандығынан айыру жазасын тағайындауды сұрады.
Резонанс тудырған іс Атырау облысының қылмыстық істер жөніндегі мамандандырылған ауданаралық сотында қаралып жатыр. Сотталушы Сұлтан Сарсемалиев бұрынғы жұбайы Ақбаян Мұқанғалиеваның ата-анасын, ағасы мен қарындасын өлтірді деп айыпталуда. Қайғылы оқиға 2025 жылдың соңында Атырау облысы Жангелдин ауылында болған.
Сот жарыссөзі кезінде прокурор Сарсемалиевті Қылмыстық кодекстің бірнеше бабы бойынша кінәлі деп тануды сұрады. Мемлекеттік айыптаушының айтуынша, сотталушыға түпкілікті жаза ретінде өмір бойына бас бостандығынан айыру жазасы тағайындалуы керек.
«Қылмыстық кодекстің 58-бабы 4-бөлігі негізінде Сарсемалиев Сұлтан Самиголлаұлына түпкілікті жаза ретінде өмір бойына бас бостандығынан айыру жазасын тағайындауды сұраймын», – деді прокурор сотта.
Айыптаушы тарап жазаны төтенше қауіпсіздік мекемесінде өтеуді ұсынды.
Сұлтан Сарсемалиевке бірнеше ауыр айып тағылған. Атап айтқанда, ол екі немесе одан да көп адамды өлтіру, кінәліге дәрменсіз күйде екені белгілі адамды өлтіру, аса қатыгездікпен кісі өлтіру, пайдакүнемдік ниетпен, қарақшылықпен немесе қорқытып алумен ұштасқан адам өлтіру, сондай-ақ бірнеше рет жасалған кісі өлтіру бойынша айыпталуда.
Бұдан бөлек, оған ірі мөлшерде ұрлық жасау, ірі мөлшерде алаяқтық, мал ұрлығы және құжаттарды заңсыз иелену, жою, бүлдіру немесе жасыру баптары бойынша да айып тағылған.
Прокурор соттан Сарсемалиевтен жәбірленушілерге өтемақы қорына 30 айлық есептік көрсеткіш, яғни 129 750 теңге өндіріп алуды сұрады. Сондай-ақ 2 512 128 теңге көлеміндегі процессуалдық шығындарды өндіру және оның қамауда ұстау түріндегі бұлтартпау шарасын өзгеріссіз қалдыру ұсынылды.
Сонымен қатар мемлекеттік айыптаушы жәбірленушілердің материалдық және моральдық шығынды өтеу туралы азаматтық талаптарын қанағаттандыруды сұрады.
Ал Сарсемалиевтің өзі Наурыз Мұқанғалиевті қасақана өлтіру эпизоды бойынша кінәсін мойындамаған.
Сот жарыссөзі аяқталғаннан кейін айыпталушыға соңғы сөз беріледі. Бұдан соң сот үкім шығару үшін кеңесу бөлмесіне кетеді.
