Senat Tóraǵasy elimizdiń indýstriialyq damýynyń kóshbasshysy bolyp tabylatyn Qaraǵandy oblysynyń áleýetine ekonomikalyq taldaý jasady. Onyń aitýynsha, bul aimaq indýstriialyq-innovatsiialyq damý jónindegi memlekettik baǵdarlamanyń aldyńǵy sapynda keledi. Munda 84 joba iske asyp, investitsiianyń jalpy somasy 252 milliard teńgeden asty, 6,4 myń jańa jumys oryndary ashyldy. Jańa óndiristerde 700 milliard teńgeden astam ónerkásip ónimderi shyǵarǵan.
Sonymen birge Q.Toqaev paidalanýǵa berilgen nysandardyń bos turyp qalýy nemese tolyq kúshinde jumys istemeýine bailanysty ótkir máselelerdi atap kórsetti. Ekonomikalyq tiimsizdigine, bankrot bolý jáne basqa da sebepterge bailanysty keibir jobalardy iske asyrýdan tolyqtai bas tartý týraly derekter bar ekenin de aitty.
Qaraǵandy oblysynda osyndai problemasy bar 10 joba bar. Tóraǵa retsiz shyǵyndarǵa aparyp soǵatyn ári memlekettik saiasatqa keri áser etetin mundai máselelerge jol berýge bolmaitynyn atap aitty. Óz kezeginde Senat Tóraǵasy aimaqtardy damytý baǵdarlamalaryn tiimdi ári oilasyp qalyptastyrýǵa shaqyrdy.
– Negizgi qarjy áleýmettik mańyzy bar jobalardy iske asyrýǵa baǵyttalýy tiis. Qarjyny únemdeýge erekshe nazar aýdarylyp otyr. Moiyndaýymyz kerek, biz osy kezge deiin shamamyzǵa qaramadyq. Endi bizge ómir kórsetip otyrǵan jańa jaǵdaiǵa beiimdelý kerek. Qymbat qyzmet kólikteri, joǵary laýazymdy sheneýnikterdiń atshaptyrym kabinetteri men basqa da ústemdik kórsetkishteri kóneniń kózi sekildi tarih qoinaýyna ketetin kezi alys emes dep oilaimyn, – dedi Q.Toqaev.
Júzdesýde Q. Toqaev azamattar tynys-tirshiliginiń sapasyn arttyrýdaǵy biznestiń áleýmettik jaýapkershiligin de eske aldy. Onyń pikirinshe, ol eń aldymen, «Arselor Mittal Temirtaý» sekildi aimaqtaǵy júie quraýshy kásiporyndarǵa qatysty bolyp otyr. «Eńbek jaǵdaiyn jaqsartý men qaýipsizdigi, qyzmetkerler eńbegin laiyqty jalaqymen qamtamasyz etý iri biznestiń kún tártibinen túspeýi tiis», – dedi Tóraǵa.
Q. Toqaev alǵashqy dárigerlik-sanitarlyq kómek sapasyn synǵa aldy. «Qazir dárigerler esep berýden qoldary bosamaitynyn moiyndaý kerek. Olardyń patsienttermen ainalysýǵa ýaqyttary qalmai barady. Kompiýterge telmirgen dáriger men eshkimge keregi bolmai qalǵan emdelýshiniń kórinisi qazir jii kezdesedi», –
dedi Tóraǵa.
Qaraǵandyǵa sapar aiasynda Senat basshysy «Lých» júike aýrýlarynan saýyqtyrý ortalyǵynda, turba men sapaly polimer ónimder shyǵaratyn «QazPlast» kásipornynda, sondai-aq «Nátije» sút fabrikasynda boldy.
