ق ر پارلامەنت سەناتىنىڭ ءتوراعاسى قاسىم-جومارت توقايەۆ جۇمىس بابىنداعى ساپارمەن قاراعاندى وبلىسىندا بولىپ، ايماق اكتيۆى مەن جۇرتشىلىق وكىلدەرىمەن كەزدەستى، – دەپ حابارلادى سەناتتى باسپا ءسوز قىزمەتى. ق. توقايەۆ مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىن ىسكە اسىرۋداعى باستى مىندەتتەرگە توقتالعان.

سەنات ءتوراعاسى ەلىمىزدىڭ يندۋستريالىق دامۋىنىڭ كوشباسشىسى بولىپ تابىلاتىن قاراعاندى وبلىسىنىڭ الەۋەتىنە ەكونوميكالىق تالداۋ جاسادى. ونىڭ ايتۋىنشا، بۇل ايماق يندۋستريالىق-يننوۆاسيالىق دامۋ جونىندەگى مەملەكەتتىك باعدارلامانىڭ الدىڭعى ساپىندا كەلەدى. مۇندا 84 جوبا ىسكە اسىپ، ينۆەستيسيانىڭ جالپى سوماسى 252 ميلليارد تەڭگەدەن استى، 6،4 مىڭ جاڭا جۇمىس ورىندارى اشىلدى. جاڭا وندىرىستەردە 700 ميلليارد تەڭگەدەن استام ونەركاسىپ ونىمدەرى شىعارعان.

سونىمەن بىرگە ق.توقايەۆ پايدالانۋعا بەرىلگەن نىسانداردىڭ بوس تۇرىپ قالۋى نەمەسە تولىق كۇشىندە جۇمىس ىستەمەۋىنە بايلانىستى وتكىر ماسەلەلەردى اتاپ كورسەتتى. ەكونوميكالىق تيىمسىزدىگىنە، بانكروت بولۋ جانە باسقا دا سەبەپتەرگە  بايلانىستى كەيبىر جوبالاردى ىسكە اسىرۋدان تولىقتاي باس تارتۋ تۋرالى دەرەكتەر بار ەكەنىن دە ايتتى.

قاراعاندى وبلىسىندا وسىنداي پروبلەماسى بار 10 جوبا بار. ءتوراعا رەتسىز شىعىندارعا اپارىپ سوعاتىن ءارى مەملەكەتتىك ساياساتقا كەرى اسەر ەتەتىن مۇنداي ماسەلەلەرگە جول بەرۋگە بولمايتىنىن اتاپ ايتتى. ءوز كەزەگىندە سەنات ءتوراعاسى ايماقتاردى دامىتۋ باعدارلامالارىن ءتيىمدى ءارى ويلاسىپ قالىپتاستىرۋعا شاقىردى.

– نەگىزگى قارجى الەۋمەتتىك ماڭىزى بار جوبالاردى ىسكە اسىرۋعا باعىتتالۋى ءتيىس. قارجىنى ۇنەمدەۋگە ەرەكشە نازار اۋدارىلىپ وتىر. مويىنداۋىمىز كەرەك، ءبىز وسى كەزگە دەيىن شامامىزعا قارامادىق. ەندى بىزگە ءومىر كورسەتىپ وتىرعان جاڭا جاعدايعا بەيىمدەلۋ كەرەك. قىمبات قىزمەت كولىكتەرى، جوعارى لاۋازىمدى شەنەۋنىكتەردىڭ اتشاپتىرىم كابينەتتەرى مەن باسقا دا ۇستەمدىك كورسەتكىشتەرى كونەنىڭ كوزى سەكىلدى تاريح قويناۋىنا كەتەتىن كەزى الىس ەمەس دەپ ويلايمىن، – دەدى ق.توقايەۆ.

جۇزدەسۋدە ق. توقايەۆ ازاماتتار تىنىس-تىرشىلىگىنىڭ ساپاسىن ارتتىرۋداعى بيزنەستىڭ الەۋمەتتىك جاۋاپكەرشىلىگىن دە ەسكە الدى. ونىڭ پىكىرىنشە، ول ەڭ الدىمەن، «ارسەلور ميتتال تەميرتاۋ» سەكىلدى ايماقتاعى جۇيە قۇراۋشى كاسىپورىندارعا قاتىستى بولىپ وتىر. «ەڭبەك جاعدايىن جاقسارتۋ مەن قاۋىپسىزدىگى،  قىزمەتكەرلەر ەڭبەگىن لايىقتى جالاقىمەن قامتاماسىز ەتۋ ءىرى بيزنەستىڭ كۇن تارتىبىنەن تۇسپەۋى ءتيىس»، – دەدى ءتوراعا.

ق. توقايەۆ العاشقى دارىگەرلىك-سانيتارلىق كومەك ساپاسىن سىنعا الدى. «ءقازىر دارىگەرلەر ەسەپ بەرۋدەن قولدارى بوسامايتىنىن مويىنداۋ كەرەك. ولاردىڭ پاسيەنتتەرمەن اينالىسۋعا ۋاقىتتارى قالماي بارادى. كومپيۋتەرگە تەلمىرگەن دارىگەر مەن ەشكىمگە كەرەگى بولماي قالعان ەمدەلۋشىنىڭ كورىنىسى ءقازىر ءجيى كەزدەسەدى»، –

دەدى ءتوراعا.

قاراعاندىعا ساپار اياسىندا سەنات باسشىسى «لۋچ» جۇيكە اۋرۋلارىنان ساۋىقتىرۋ ورتالىعىندا، تۇربا مەن ساپالى پوليمەر ونىمدەر شىعاراتىن «قازپلاست» كاسىپورنىندا، سونداي-اق «ناتيجە» ءسۇت فابريكاسىندا بولدى.