Atbasarda pyshaq jaraqatymen óz páterinen es-tússiz kúide tabylǵan 58 jastaǵy áiel qaitys boldy. Oqiǵaǵa bailanysty kúdikti retinde onyń kórshisi ustaldy, dep habarlaidy dalanews.kz.
Aldyn ala málimet boiynsha, áiel ish tusynan birneshe ret pyshaq jaraqatyn alǵan. Boljam boiynsha, kórshisi oǵan pyshaqpen shabýyl jasaǵannan keiin páterdiń esigin syrtynan qulyptap, oqiǵa ornynan ketip qalǵan. Pyshaqty da ózimen birge alyp ketkeni aitylady.
Oqiǵa ornyna kelgen politseiler páterge kirý úshin esikti buzyp ashqan. Ishten es-tússiz jatqan 58 jastaǵy áiel tabylǵan. Keiin onyń alǵan jaraqattarynan kóz jumǵany belgili boldy.
Aqmola oblysynyń Politsiia departamenti kúdiktiniń ustalyp, ýaqytsha ustaý izoliatoryna qamalǵanyn habarlady.
«Densaýlyqqa qasaqana aýyr ziian keltirý, abaisyzda jábirlenýshiniń ólimine ákep soǵý deregi boiynsha qylmystyq is qozǵaldy. Qazirgi ýaqytta oqiǵanyń mán-jaiyn anyqtaýǵa baǵyttalǵan qajetti tergeý áreketteri júrgizilip jatyr», – dep habarlady Aqmola oblysynyń Politsiia departamenti.
Sotqa deiingi tergeý Qylmystyq kodekstiń 106-babynyń 3-bóligi boiynsha júrgizilip jatyr.
