Pýtin syrqat pa?
Jel soqpasa, shóptiń basy qimyldamaidy. Prezident te adam ǵoi. Basy aýyryp, baltyry syzdaǵan shyǵar. Biraq Kremldiń baspasóz qyzmetiniń basshysy Dmitrii Peskov Pýtinniń naýqastanbaǵanyn aityp, jýrnalisterdi sendirýge áreket etip júr.
Qalai bolǵanda da sońǵy saiasi jaǵdailar Resei basshysynyń júikesin jún qylǵany jasyryn emes. Ýkrainadaǵy ýshyqqan saiasi ahýal, AQSh pen Batys elderiniń Reseige salǵan sanktsiiasy, rýbldiń qunsyzdanýy, bári-bári Pýtinniń júregine salmaq túsirmei tursyn ba?! Kún saiyn jalyndap sóilep, kógildir ekrannan túspeitin adamdy bir sátke joǵaltyp alsań, túrli oiǵa erik beretiniń kádik. Onyń ózi álemdi aýzyna qaratqan alyp eldiń Prezidenti bolsa. Bir kún aýrý, bir kún saý Islam Kárimov bolsa, bulaisha dúrlikpes edi jurtshylyq. Osyǵan deiin bizder teledidardan Pýtinniń qara belbeýdi shart býyp, shyǵys jepe-jegimen ainalysyp jatqanyn, odan qalsa, teńizshilerdiń «telniashkasyn» kiip, kók teńizde júrgenin jii kóretinbiz. Aqparat quraldary Pýtinniń 5 naýryzdan beri jýrnalisterdiń nazaryna ilkpegenin qyzý talqylap jatyr. Dál osy kúni ol Italiianyń Premer-Ministri Matteo Rentsidi qabyldaǵany belgili. Sońǵy ret Resei Prezidentiniń ákimshiliginiń resmi saity V.Pýtinniń Kareliia Respýblikasynyń basshysy Aleksandr Hýdilainenmen kezdesken fotosyn jariialady. Biletinder bul foto 4 naýryz kúni túsirilgenin aityp qaldy. 6-naýryzdan bastap Resei basshysy jýrnalisterdiń qatysýynsyz biraz sheneýnikti qabyldaǵany belgili. Aitalyq, 10 naýryz kúni V.Pýtin Iamal-Nenetsk avtonomdy okrýginiń gýbernatory Dmitrii Kobylkindi qabyldaǵan. Bul kezdesýge de jýrnalister qatysqan joq. «RBK» saity 10 naýryzda V.Pýtinniń gýbernatormen kezdespegenin jazdy.
Al resmi Astana Resei prezidentin 12 naýryzda kútken edi. Bul joly Qazaqstan, Resei jáne Belarýs basshylary ózara bas qosyp, ekonomikalyq bailanys jáne Ýkrainadaǵy saiasi jaǵdaidy talqylaýy tiis bolatyn. Kezdesý keiinge ysyryldy. Nege bulai bolǵany ázirge jumbaq. Belarýs taraby kezdesýge qatysty túsinikteme berýden múlde bas tartty. Kremldiń baspasóz qyzmetiniń jetekshisi «Pýtin din-aman, densaýlyǵy jaqsy. Qol alysqan adamnyń qolyn syndyratyndai qairatty» dep kókeidegi kóp suraqqa qaǵytpa ázilmen jaýap berdi. Kim bilgen, bárimiz pendemiz ǵoi...
