پۋتين سىرقات پا?
جەل سوقپاسا, شٶپتٸڭ باسى قيمىلدامايدى. پرەزيدەنت تە ادام عوي. باسى اۋىرىپ, بالتىرى سىزداعان شىعار. بٸراق كرەملدٸڭ باسپاسٶز قىزمەتٸنٸڭ باسشىسى دميتريي پەسكوۆ پۋتيننٸڭ ناۋقاستانباعانىن ايتىپ, جۋرناليستەردٸ سەندٸرۋگە ەرەكەت ەتٸپ جٷر.
قالاي بولعاندا دا سوڭعى ساياسي جاعدايلار رەسەي باسشىسىنىڭ جٷيكەسٸن جٷن قىلعانى جاسىرىن ەمەس. ۋكرايناداعى ۋشىققان ساياسي احۋال, اقش پەن باتىس ەلدەرٸنٸڭ رەسەيگە سالعان سانكتسيياسى, رۋبلدٸڭ قۇنسىزدانۋى, بەرٸ-بەرٸ پۋتيننٸڭ جٷرەگٸنە سالماق تٷسٸرمەي تۇرسىن با?! كٷن سايىن جالىنداپ سٶيلەپ, كٶگٸلدٸر ەكراننان تٷسپەيتٸن ادامدى بٸر سەتكە جوعالتىپ الساڭ, تٷرلٸ ويعا ەرٸك بەرەتٸنٸڭ كەدٸك. ونىڭ ٶزٸ ەلەمدٸ اۋزىنا قاراتقان الىپ ەلدٸڭ پرەزيدەنتٸ بولسا. بٸر كٷن اۋرۋ, بٸر كٷن ساۋ يسلام كەرٸموۆ بولسا, بۇلايشا دٷرلٸكپەس ەدٸ جۇرتشىلىق. وسىعان دەيٸن بٸزدەر تەلەديداردان پۋتيننٸڭ قارا بەلبەۋدٸ شارت بۋىپ, شىعىس جەپە-جەگٸمەن اينالىسىپ جاتقانىن, ودان قالسا, تەڭٸزشٸلەردٸڭ «تەلنياشكاسىن» كيٸپ, كٶك تەڭٸزدە جٷرگەنٸن جيٸ كٶرەتٸنبٸز. اقپارات قۇرالدارى پۋتيننٸڭ 5 ناۋرىزدان بەرٸ جۋرناليستەردٸڭ نازارىنا ٸلكپەگەنٸن قىزۋ تالقىلاپ جاتىر. دەل وسى كٷنٸ ول يتالييانىڭ پرەمەر-مينيسترٸ ماتتەو رەنتسيدٸ قابىلداعانى بەلگٸلٸ. سوڭعى رەت رەسەي پرەزيدەنتٸنٸڭ ەكٸمشٸلٸگٸنٸڭ رەسمي سايتى ۆ.پۋتيننٸڭ كارەلييا رەسپۋبليكاسىنىڭ باسشىسى الەكساندر حۋديلاينەنمەن كەزدەسكەن فوتوسىن جارييالادى. بٸلەتٸندەر بۇل فوتو 4 ناۋرىز كٷنٸ تٷسٸرٸلگەنٸن ايتىپ قالدى. 6-ناۋرىزدان باستاپ رەسەي باسشىسى جۋرناليستەردٸڭ قاتىسۋىنسىز بٸراز شەنەۋنٸكتٸ قابىلداعانى بەلگٸلٸ. ايتالىق, 10 ناۋرىز كٷنٸ ۆ.پۋتين يامال-نەنەتسك اۆتونومدى وكرۋگٸنٸڭ گۋبەرناتورى دميتريي كوبىلكيندٸ قابىلداعان. بۇل كەزدەسۋگە دە جۋرناليستەر قاتىسقان جوق. «ربك» سايتى 10 ناۋرىزدا ۆ.پۋتيننٸڭ گۋبەرناتورمەن كەزدەسپەگەنٸن جازدى.
ال رەسمي استانا رەسەي پرەزيدەنتٸن 12 ناۋرىزدا كٷتكەن ەدٸ. بۇل جولى قازاقستان, رەسەي جەنە بەلارۋس باسشىلارى ٶزارا باس قوسىپ, ەكونوميكالىق بايلانىس جەنە ۋكرايناداعى ساياسي جاعدايدى تالقىلاۋى تيٸس بولاتىن. كەزدەسۋ كەيٸنگە ىسىرىلدى. نەگە بۇلاي بولعانى ەزٸرگە جۇمباق. بەلارۋس تارابى كەزدەسۋگە قاتىستى تٷسٸنٸكتەمە بەرۋدەن مٷلدە باس تارتتى. كرەملدٸڭ باسپاسٶز قىزمەتٸنٸڭ جەتەكشٸسٸ «پۋتين دٸن-امان, دەنساۋلىعى جاقسى. قول الىسقان ادامنىڭ قولىن سىندىراتىنداي قايراتتى» دەپ كٶكەيدەگٸ كٶپ سۇراققا قاعىتپا ەزٸلمەن جاۋاپ بەردٸ. كٸم بٸلگەن, بەرٸمٸز پەندەمٸز عوي...
