Bul jóninde Výchich RTS ulttyq telekanalynda málimdedi. "Prezident Pýtin men Sergei Lavrov meniń aldymda eshqashan keshirim suraǵan emes. Biraq Zaharova úshin ekeýi de keshirim surady. Bizdiń qarym-qatynasymyz jaqsy dep esepteimin. Bolǵan jait men úshin mańyzdy emes", - dep Aleksandr Výchich sózderine silteme jasaidy RIA Novosti agenttigi.
"Podiom" basylymynyń jazýynsha, Kreml baspasóz hatshysy Dmitrii Peskov Pýtinniń Výchich aldynda keshirim suraǵanyn rastady.
Beisenbi kúni eki el prezidenti Zaharovanyń Feisbýkte jariialaǵan postynan keiingi diplomatiialyq janjaldan soń birinshi ret telefon arqyly sóileskeni habarlandy.
Resei syrtqy ister ministrliginiń resmi ókili Mariia Zaharova Serbiia prezidenti Aleksandr Výchich pen AQSh prezidenti Donald Tramptyń Aq úide kezdesýiniń sýretin jariialaǵan. Sýrette Výchich kabinet ortasynda oryndyqta otyr. Al Tramp stoldyń arǵy betinde qarama-qarsy otyr. Mariia Zaharova janyna "Basty instinkt" filminen úzindi keltirgen.
Onda filmdegi kadrden úzindi keltirip, "Eger sizdi Aq úi shaqyrsa, oryndyqty osylai qoisa, #2 sýrettegidei otyryńyz" dep jazǵan.
Aleksandr Výchich Mariia Zaharovanyń postyn dóreki ári qarabaiyr dep atady. Bul post birqatar serb saiasatkerleriniń ashýyn týǵyzdy.
Zaharova artynsha keshirim surady.
Kreml baspasóz qyzmetiniń aqparatyna qaraǵanda, Pýtin men Výchich Kosovodaǵy problemalardy retteý máselesin talqylaǵan.
