General-maior, Qazaqstannyń Ulttyq qaýipsizdik komitetin basqarǵan Álnur Musaev qandai jaǵdaida Pýtinniń kózi joiylatynyn aitty, - dep habarlaidy Dalanews.kz.
Álnur Musaevtyń sózinshe, Pýtin iadrolyq qarýdy basqa elge qarsy qoldanbaq bolsa, onyń (Pýtinniń) kózin qurtý jospary daiyn tur.
"Ol áli ázirlenip jatqan jospar emes. Eger iadrolyq qarýdy qoldaný qaýpi bola qalsa iske asatyn eń joǵary deńgeide bekitilip qoiǵan jospar bar. Arnaiy qyzmetter iadrolyq qarý qashan qoldanylatynyn biledi, biraq iadrolyq qarýdy qoldaný múmkindigi áli tómen deńgeide. Alaida jospar daiyn. Eń birinshi kezekte Pýtinniń kózi joiylady", - deidi Musaev Dmitrii Gordonnyń YouTube-arnasyna bergen suhbatynda.
Álnur Musaev Pýtindi aqsha úshin ǵana emes, jeke maqsaty úshin óltirgisi keletinder baryn aitady.
"Biraq muny jalǵyz adam uiymdastyra almaidy. Jalǵyz adam Pýtindi qandai da bir is-sharada ǵana qastandyq jasap óltire alatyn shyǵar. Biraq Pýtinniń qaýipsizdik sharasy myqty bolǵandyqtan ony óltirý ońaiǵa soqpas", - deidi Musaev.
Aita keteiik, Pýtin jeke oqqaǵarlaryn ózi tańdaidy degen áńgimeler taraǵan bolatyn. Ol jeke kúzetshilerine arnaiy talap ta qoiady: olarǵa smartfon ustaýǵa bolmaidy, bir-birimen sóilesýge bolmaidy, pasporttaryn ótkizip qoiady, al rezidentsiiaǵa kirer aldynda olardyń denesin rentgennen skanerleidi.
"Pýtinniń eshkimge senbeitini bárine belgili. Eger baiaǵydan saiasatta júrgen adam bolsań, arnaiy qyzmetter qandai ádister qoldanatynyn bilseń, eń birinshi oi – eshkimge senbeý. Sondyqtan Pýtin osyndai qaýipsizdik sharalaryn jasaidy.
Odan bólek, Pýtinde psihikalyq aýytqý – shizofreniia bar. Kóptegen adam shizofreniiaǵa shaldyqqan adam birtúrli nárseler jasaidy dep oilaidy. Biraq shizofrenik – óte qý bolady jáne bir maqsat qoisa, soǵan jetý úshin qiyn, zulym shemalarmen jumys isteidi. Sondyqtan Pýtin esi durys adam siiaqty kórinedi. Biraq men kóp shizofrenikpen sóilesken adammyn. Sondyqtan Pýtinde shizofreniianyń aýyr túri bar", - deidi Álnur Musaev.
