Eks-prezident Nursultan Nazarbaev Pýtinnen Jeńistiń 80-jyldyǵyna orai ótetin sherýge shaqyrtý alǵan, - dep habarlaidy Dalanews.kz.
Bul týraly telegram arnalardaǵy derekkózder habarlady.
"Eks-prezidenttiń ainalasyndaǵylar Nazarbaev Pýtinniń Jeńistiń 80-jyldyǵyna orai ótetin sherýge jibergen shaqyrtýyn qabyldaǵanyn biledi. Erekshe atap ótetin jait: Resei astanasynda ótetin merekelik sharaǵa shaqyrtý tuńǵysh prezidentke de, qazirgi memleket basshysyna jiberilgen. Biraq Toqaev Nazarbaevqa qaraǵanda shaqyrtýdy qabyldamaǵan", - delingen jazbada.
Buǵan deiin prezident Qasym-Jomart Toqaev "Ana tili" gazetine bergen suhbatynda Pýtin men Nazarbaevtyń kezdesýi týraly pikir bildirgen bolatyn.
"Jaqynda tuńǵysh prezidenttiń Máskeýge baryp, Vladimir Pýtinmen kezdesýin jurtshylyq san-saqqa júgirtti. Bilikten ketkennen keiin bes jyldan soń bulai júzdesýdiń aqylǵa syimaityny aityldy. Qazaqstanda aldaǵy ýaqytta Prezident sailaýy ótedi-mis degen boljamdar da paida boldy. Mundai kezdesý kimge jáne ne úshin qajet, buǵan kim bastamashy boldy? Sizdiń pikirińizdi bilsek", - dep surady jýrnalist.
"Nursultan Nazarbaev pen Vladimir Pýtinniń jeltoqsandaǵy kezdesýi ótken jyldaǵy ekinshi júzdesýi ǵoi deimin. Kúz basyndaǵy birinshi kezdesý týraly buqaralyq aqparat quraldarynda aitylǵan joq. Olar baiyrǵy dostar ári áriptester retinde júzdesetin bolsa kerek, ortaq áńgimeleri de bar shyǵar. Mundai kezdesýler ádette Nursultan Ábishulynyń bastamasymen ótedi. Ol úshin munyń mańyzy zor. Burynǵy Qazaq KSR Ministrler Keńesiniń tóraǵasy, partiia basshysy jáne egemen Qazaqstannyń prezidenti retinde Nursultan Ábishulynyń Kremlmen tyǵyz moraldyq jáne saiasi bailanysy baryn esten shyǵarmaǵan jón. Onyń talai ýaqyty Máskeýde ótti, san márte issaparǵa bardy, sezd jáne pleným otyrystaryna qatysty, jumys babymen jáne resmi saparlarmen de boldy", - dedi prezident Toqaev.
Aita keteiik, 14 jeltoqsanda Resei prezidenti Vladimir Pýtin óziniń Novo-Ogariovo rezidentsiiasynda Qazaqstannyń eks-prezidenti Nursultan Nazarbaevty qabyldady. Alaida kezdesý týraly eshqandai tolyq aqparat joq.
