ەكس-پرەزيدەنت نۇرسۇلتان نازاربايەۆ پۋتيننەن جەڭىستىڭ 80-جىلدىعىنا وراي وتەتىن شەرۋگە شاقىرتۋ العان، - دەپ حابارلايدى Dalanews.kz.
بۇل تۋرالى تەلەگرام ارنالارداعى دەرەككوزدەر حابارلادى.
"ەكس-پرەزيدەنتتىڭ اينالاسىنداعىلار نازاربايەۆ ءپۋتيننىڭ جەڭىستىڭ 80-جىلدىعىنا وراي وتەتىن شەرۋگە جىبەرگەن شاقىرتۋىن قابىلداعانىن بىلەدى. ەرەكشە اتاپ وتەتىن جايت: رەسەي استاناسىندا وتەتىن مەرەكەلىك شاراعا شاقىرتۋ تۇڭعىش پرەزيدەنتكە دە، قازىرگى مەملەكەت باسشىسىنا جىبەرىلگەن. ءبىراق توقايەۆ نازاربايەۆقا قاراعاندا شاقىرتۋدى قابىلداماعان"، - دەلىنگەن جازبادا.
بۇعان دەيىن پرەزيدەنت قاسىم-جومارت توقايەۆ "انا ءتىلى" گازەتىنە بەرگەن سۇحباتىندا پۋتين مەن نازاربايەۆتىڭ كەزدەسۋى تۋرالى پىكىر بىلدىرگەن بولاتىن.
"جاقىندا تۇڭعىش پرەزيدەنتتىڭ ماسكەۋگە بارىپ، ۆلاديمير پۋتينمەن كەزدەسۋىن جۇرتشىلىق سان-ساققا جۇگىرتتى. بيلىكتەن كەتكەننەن كەيىن بەس جىلدان سوڭ بۇلاي جۇزدەسۋدىڭ اقىلعا سىيمايتىنى ايتىلدى. قازاقستاندا الداعى ۋاقىتتا پرەزيدەنت سايلاۋى وتەدى-مىس دەگەن بولجامدار دا پايدا بولدى. مۇنداي كەزدەسۋ كىمگە جانە نە ءۇشىن قاجەت، بۇعان كىم باستاماشى بولدى؟ ءسىزدىڭ پىكىرىڭىزدى بىلسەك"، - دەپ سۇرادى جۋرناليست.
"نۇرسۇلتان نازاربايەۆ پەن ۆلاديمير ءپۋتيننىڭ جەلتوقسانداعى كەزدەسۋى وتكەن جىلداعى ەكىنشى جۇزدەسۋى عوي دەيمىن. كۇز باسىنداعى ءبىرىنشى كەزدەسۋ تۋرالى بۇقارالىق اقپارات قۇرالدارىندا ايتىلعان جوق. ولار بايىرعى دوستار ءارى ارىپتەستەر رەتىندە جۇزدەسەتىن بولسا كەرەك، ورتاق اڭگىمەلەرى دە بار شىعار. مۇنداي كەزدەسۋلەر ادەتتە نۇرسۇلتان ءابىش ۇلىنىڭ باستاماسىمەن وتەدى. ول ءۇشىن مۇنىڭ ماڭىزى زور. بۇرىنعى قازاق كسر مينيسترلەر كەڭەسىنىڭ ءتوراعاسى، پارتيا باسشىسى جانە ەگەمەن قازاقستاننىڭ پرەزيدەنتى رەتىندە نۇرسۇلتان ءابىش ۇلىنىڭ كرەملمەن تىعىز مورالدىق جانە ساياسي بايلانىسى بارىن ەستەن شىعارماعان ءجون. ونىڭ تالاي ۋاقىتى ماسكەۋدە ءوتتى، سان مارتە ءىسساپارعا باردى، سەزد جانە پلەنۋم وتىرىستارىنا قاتىستى، جۇمىس بابىمەن جانە رەسمي ساپارلارمەن دە بولدى"، - دەدى پرەزيدەنت توقايەۆ.
ايتا كەتەيىك، 14 جەلتوقساندا رەسەي پرەزيدەنتى ۆلاديمير پۋتين ءوزىنىڭ نوۆو-وگاروۆو رەزيدەنسياسىندا قازاقستاننىڭ ەكس-پرەزيدەنتى نۇرسۇلتان نازاربايەۆتى قابىلدادى. الايدا كەزدەسۋ تۋرالى ەشقانداي تولىق اقپارات جوق.
