Onyń pikirinshe basqynshylar ne alǵa jylji almaityn, ne keri shegine almaityn dármensiz kúige túsken.
Shabýyldaityn qaýqary joq, boldyryp qalǵan, keri sheginer bolsa, opasyzdyq jasaǵany úshin qýdalaýǵa ushyraidy.
Shoigý basqaratyn áskeri sala korrýptsiianyń ordasyna ainalǵan. Áskerge bólingen ailapat aqsha jemqorlardan artylmaidy. Resei armiiasy aibynynan aiyrylǵan, qatardaǵy sarbazdar azyp-tozyp júr. Olardyń Pýtinniń buiryǵyna baǵynýdan basqa amaly joq.
Sói degen Sergei Kanev Qorǵanys salasyndaǵy "barmaq basty, kóz qysty" árekettiń Ýkrain jerinde áshkere bolǵanyn egjei-tegjeili áńgimelepti.
"Resei armiiasyndaǵy jemqorlyqtyń shekten shyqqany sonsha, basqynshylarda deni durys bailanys quraly joq. Pýtin myń jerden buiyrsa da, qarapaiym tildesý quralynan tapshylyq kórip otyrǵan ásker alǵa jyljymaidy.
Tutqynǵa túsken orys okkýpanttaryn tyńdasańyz, "biz bailanyssyz otyrdyq, habar-osharsyz qaldyq, kimniń qaida júrgeni belgisiz, ratsiiaǵa zárýimiz" dep zar ilep otyr.
Shoigý maqtaýyn asyrǵan "Azart" radiostantsiiasy soǵys jaǵdaiyna jaramsyz bolyp shyqty, shetinen isten shyǵyp jatyr. Okkýpanttar telefon arqyly tildesýge májbúr, olardyń áńgimesin ýkraindar sol mezette shap berip, orys áskeriniń ornalasqan jerin anyqtaýda. Ratsiiaǵa zárý, janarmaiy taýsylǵan, tankisi talqandalǵan, ashtyqtan buratylǵan orys áskeri ýkrain aýyldaryn tonaýdan ózge túk bitirip júrgen joq, Pýtin armiiasynyń qazirgi siqy osy.
Qorǵanys ministriliginiń tapsyrysymen jasalǵan atyshýly "Era" smartfony da kúresinde jatyr, túkke jaramaidy. Ekeýara áńgimeni qupiiada ustaidy, úshinshi taraptyń kiligýinen qorǵaidy degen telefondy paidalaný úshin 3G nemese 4G jelileri qosylyp turýy kerek. Ýkrainaǵa basyp kirgen orys áskeri aldymen uialy bailanystyń munaralaryn atqylaǵan edi...", – deidi reseilik jýrnalist.
Onyń atap ótkenindei, amaly taýsylǵan okkýpanttar qytaidyń arzanqol (Baofeng) ratsiiasyn paidalanýǵa májbúr. Shoigýdan kómek kúte, kúderi úzilgen ásker óz betinshe kún kórýge kóshipti.
"Áskerilerdiń aitýynsha qytaidyń ratsiia siqy joq, sýyqqa shydamsyz, qýaty tez taýsylatyn, úlbiregen qurylǵysyn AliEkspressten-aq satyp alýǵa bolady. Atynan at úrketin orys áskeri AliEkspresste samsap turǵan sapasyz dúnieni soǵysqa salyp júr", – deidi Sergei Kanev.
Al Shoigýdyń shabarmandary Pýtin aitatyn "áskeri operatsiianyń" qyzyǵyn kórýde. Qorǵanys ministrligindegi shendi-shekpendiler osy naýqanǵa bólingen qyrýar qarajatty edel-jedel "igerý" ústinde eken.
Sói degen Kanev Shoigýdyń oń qoly sanalatyn, Qorǵanys ministrligindegi Bailanys basqarmasynyń basshysy, general Halil Arsylanovqa shúiligipti.
"Soǵysta túkke jaramai qalǵan "Azart" ratsiialaryn satyp alýǵa Arsylanovtyń basqarmasy 6,7 mlrd rýbl jumsap jiberdi. Pýtinniń propaganda quraldary bul týraly tis jarmaidy. Bizdiń elde eshnárseniń esebi joq. Buǵan bólingen esil aqsha Shoigý, Arsylanov sekildi paraqorlardyń qaltasynda ketti. Bógde elde oqqa ushyp, kómýsiz qalǵan orys sarbazdarynyń taǵdyry eshkimdi tolǵandyrmaidy", – deidi Kanev.
