Resei tarapynyń bastamasymen Vladimir Pýtin men Ázerbaijan Respýblikasynyń Prezidenti Ilham Áliev arasynda telefon arqyly áńgime ótti, - dep habarlaidy Dalanews.kz Kremlge siltep.
Áńgime barysynda 25 jeltoqsanda Qazaqstannyń Aqtaý qalasynyń mańynda "Ázerbaijan áýe joldary" áýekompaniiasyna tiesili jolaýshylar ushaǵynyń apatqa ushyraýyna qatysty máseleler jan-jaqty talqylandy.
Vladimir Pýtin bul qaiǵyly oqiǵa Resei áýe keńistiginde bolǵany úshin keshirim surap, qaza tapqandardyń otbasylaryna tereń jáne shynaiy kóńil aityp, zardap shekkenderge tez saýyǵyp ketýin tiledi. Áńgime barysynda Ázerbaijannyń jolaýshylar ushaǵy kestege sáikes birneshe ret Groznyi qalasynyń áýejaiyna qonýǵa tyrysqany atap ótildi. Sol ýaqytta Groznyi, Mozdok jáne Vladikavkaz qalalaryna ýkraindyq soǵys drondarymen shabýyl jasalyp, Reseidiń áýe shabýylyna qarsy qorǵanys júieleri bul shabýyldardy toitarýmen ainalysqan.
Reseidiń Tergeý komiteti qylmystyq kodekstiń 263-baby (áýe kóligin paidalaný jáne qaýipsizdik erejelerin buzý) boiynsha qylmystyq is qozǵady. Alǵashqy tergeý áreketteri júrgizilip, azamattyq jáne áskeri mamandardan jaýap alynyp jatyr.
Qazirgi ýaqytta Ázerbaijan Bas prokýratýrasynyń eki qyzmetkeri Groznyi qalasynda jumys istep, Resei Federatsiiasynyń Bas prokýratýrasy men Tergeý komiteti ókilderimen birlesip tergeý júrgizip jatyr. Sondai-aq, Resei, Ázerbaijan jáne Qazaqstannyń tiisti qyzmetteri Aqtaý qalasy mańyndaǵy apat ornynda tyǵyz yntymaqtastyqta jumys istep jatyr.
