– Memleket basshysy Qasym-Jomart Toqaev koronavırýspen kúresýdiń birden-bir ári senimdi joly vaksına salý ekenin atap ótti. PTR-testterdi qoldan jasaý jáne paıdalaný faktileri boıynsha İshki ister mınıstrligi óz quzireti sheginde qajetti sharalar qabyldaýda. Keıbir azamattar qazirgi jaǵdaıdy paıda tabý úshin paıdalanady, PTR-test nátıjeleri men vaksınalaý pasportyn qoldan jasaıdy, osylaısha koronavırýstyń taralýyna septesedi, – delingen QR İİM baspasóz qyzmetiniń habarlamasynda.
Vedomstvonyń habarlaýynsha, negizinen satýǵa arnalǵan usynystar ınternette jáne áleýmettik jeliler men messendjerlerde taralady.
Al «satýshylar» únemi ózgerip otyratyn vırtýaldy telefon nómirlerin jıi paıdalanady. Sondyqtan, İshki ister mınıstrligi men onyń aýmaqtyq bólimshelerinde jalǵan qujat satý týraly jarnamalardy anyqtaý úshin turaqty baqylaý toptary jumys isteıdi.
– Tek shilde aıynyń basynan bastap, osyndaı 41 jarnama anyqtaldy, munda belgili bir somaǵa vaksınalaý týraly jalǵan pasporttar nemese testilerdiń oń nemese teris nátıjeleri bar testilik formalar usynylǵan. İshki ister organdary jalǵan PTR sertıfıkattaryn jáne vaksınalaý tólqujattaryn satý faktilerin anyqtaý boıynsha basqa da sharalardy qabyldaýda. Polıseıler jalǵan qujattar berý faktilerin anyqtaý úshin medısınalyq ortalyqtardy, emhanalardy, vaksına qabyldaý pýnktterin tekserýdi jalǵastyrýda, – deıdi QR İİM.
Jyl basynan beri ishki ister organdary jalǵan PTR test satý jáne paıdalaný boıynsha 25 qylmystyq is jáne jalǵan vaksına pasporty boıynsha 11 is qozǵaǵan.
Aıta keteıik, qylmystyq quqyqbuzýshylyqtyń osy túri úshin QR QK 385-baby («Jalǵan qujattardy, mórtabandardy, mórlerdi, blankilerdi, memlekettik nagradalardy qoldan jasaý, jasaý nemese satý») boıynsha 2000 AEK-ke deıin aıyppul (5,8 mln teńge) belgilengen, nemese sol mólsherde túzeý jumystary nemese 600 saǵatqa deıin qoǵamdyq jumystarǵa tartý nemese 2 jylǵa deıin bostandyqty shekteý nemese sol merzimge bas bostandyǵynan aıyrý jazasy taǵaıyndalǵan.
Dál sol is-áreketter birneshe ret nemese aldyn-ala sóz baılasý arqyly jasalǵan jaǵdaıda 4000 AEK (11,6 mln teńge) aıyppul nemese sol mólsherde túzeý jumystary nemese 1000 saǵatqa deıin qoǵamdyq jumystarǵa tartý nemese 4 jylǵa deıin bas bostandyǵynan aıyrý bostandyqty shekteý joldarymen jazalanady.
– Jalǵan vaksınalaý pasportyn bile tura qoldanǵandar úshin 160 AEK-ke deıin aıyppul salynady (467 myń teńge), nemese sol mólsherde túzeý jumystary nemese 160 saǵatqa deıin qoǵamdyq jumystarǵa tartylady nemese 40 táýlikke qamaýǵa alynady (Qylmystyq kodekstiń 3-baby). Osyǵan baılanysty İshki ister mınıstrligi azamattarǵa úndeý jasaıdy – ózińizdi qylmystyq proseske tartýǵa jol bermeńiz jáne týystaryńyz ben dostaryńyzdy qorǵańyz. Jalǵan qujattar alýǵa tyrysyp, alaıaqtardyń qurbany bolýyńyz múmkin, – dep eskertti İshki ister mınıstrligi.
