Sot zalynan «Adyrna» ulttyq portalynyń redaktory Ońǵar Qabden tikelei efirden habar tartty. Ońǵar Qabdenniń aitýynsha, sotqa óte kóp adam jinalǵandyqtan jurt shaǵyn zalǵa syimaǵan.
Sotqa Qaster men Muragerdiń týǵan-týystarynan bólek, Zaisannyń jergilikti basylymynan jýrnalister, Qazaqstannyń túrli aimaqtarynan kelgen belsendiler, jeltoqsanshylar, bloger azamattar kelgen.
Tikelei efirden baiqaǵanymyzdai, sot zaly jinalǵan qaýymǵa tarlyq etken. Jinalǵandar sot zalynyń tarlyǵyna narazy ekenin ashyq bildirýde.
Ońǵar Qabdenniń aitýynsha, sot zalyna syimaǵan halyq ózderiniń ókilderin jiberip, syrtta turýǵa kelisim bergen.
Sot barysynda prokýror «shekarany zańsyz kesip ótti» dep aiyptalǵan Shyńjań qazaqtary Qaster men Muragerdiń árqaisysyn bir jylǵa sottaýdy surady. Memlekettik aiyptaýshy «jeńildetilgen mán-jailardy eskerip» olardy Qytaiǵa qaitarmaýdy ótindi.
Al qorǵaý taraby olardy kinásiz dep tanyp, qylmystyq jaýapkershilikten bosatýdy surady. Advokat Lázzat Ahatova eki jigittiń Qytaidaǵy qysymnan qashyp, «shekarany zańsyz kesip ótýge» májbúr bolǵanyn aitty. Al sotta ózderine taǵylǵan aiyptardy moiyndaǵan Qaster Musahanuly men Murager Álimuly ózderin Qytaiǵa qaitarmaýdy surady. Sýdia Ospanova Nur-Sultan ýaqytymen 16:00-de úkim oqylatynyn aityp, keńesý bólmesine ketti.
