Qazaqstan Respýblikasy Bas prokýratýrasy birqatar buqaralyq aqparat quraldarynda taraǵan málimetke bailanysty túsinikteme berdi. Onda Qyzylorda oblysynda Ulttyq qaýipsizdik komiteti (UQK) qyzmetkerleri tarapynan esirtki satý deregi boiynsha ustalǵan, sondai-aq basqa bir óńirde para alý isine qatysty kúdikke ilingen prokýratýra qyzmetkerlerine qatysty jaǵdai baiandalady, dep habarlaidy Dalanews.kz.
"BAQ-ta jariialanǵan aqparatqa bailanysty Bas prokýratýra mynany habarlaidy: Qyzylorda oblysynda esirtki zattaryn satý kúdigimen ustalǵan tulǵa oqiǵa oryn alǵan sátte quqyq qorǵaý organdarynyń qyzmetkeri bolyp tabylmaǵan. Sonymen qatar, UQK-niń Qyzylorda oblysy boiynsha departamenti men QR Bas prokýratýrasy Ishki qaýipsizdik departamentiniń birlesip júrgizgen jedel-izdestirý sharalarynyń nátijesinde Ulytaý oblysynda QR Qylmystyq kodeksiniń 190-baby (alaiaqtyq) boiynsha sotqa deiingi tergeý tirkeldi", – delingen Bas prokýratýranyń KazTAG redaktsiiasynyń resmi suraýyna bergen jaýabynda.
Buǵan deiin UQK qyzmetkerleri esirtki saýdasyna qatysty Oljas Áliev esimdi azamatty ustaǵany habarlanǵan. Ol Qyzylorda oblystyq prokýratýrasynyń qyzmetkeri bolýy múmkin degen boljam aitylǵan. Sonymen qatar dál sol óńirde Ulytaý oblysynyń prokýratýrasynda qyzmet etetin Samat Qaniev esimdi azamattyń para alý kúdigimen ustalǵany týraly aqparat taraǵan.
