قازاقستان رەسپۋبليكاسى باس پروكۋراتۋراسى ءبىرقاتار بۇقارالىق اقپارات قۇرالدارىندا تاراعان مالىمەتكە بايلانىستى تۇسىنىكتەمە بەردى. وندا قىزىلوردا وبلىسىندا ۇلتتىق قاۋىپسىزدىك كوميتەتى (ۇقك) قىزمەتكەرلەرى تاراپىنان ەسىرتكى ساتۋ دەرەگى بويىنشا ۇستالعان، سونداي-اق باسقا ءبىر وڭىردە پارا الۋ ىسىنە قاتىستى كۇدىككە ىلىنگەن پروكۋراتۋرا قىزمەتكەرلەرىنە قاتىستى جاعداي باياندالادى، دەپ حابارلايدى Dalanews.kz.
"باق-تا جاريالانعان اقپاراتقا بايلانىستى باس پروكۋراتۋرا مىنانى حابارلايدى: قىزىلوردا وبلىسىندا ەسىرتكى زاتتارىن ساتۋ كۇدىگىمەن ۇستالعان تۇلعا وقيعا ورىن العان ساتتە قۇقىق قورعاۋ ورگاندارىنىڭ قىزمەتكەرى بولىپ تابىلماعان. سونىمەن قاتار، ۇقك-نىڭ قىزىلوردا وبلىسى بويىنشا دەپارتامەنتى مەن ق ر باس پروكۋراتۋراسى ىشكى قاۋىپسىزدىك دەپارتامەنتىنىڭ بىرلەسىپ جۇرگىزگەن جەدەل-ىزدەستىرۋ شارالارىنىڭ ناتيجەسىندە ۇلىتاۋ وبلىسىندا ق ر قىلمىستىق كودەكسىنىڭ 190-بابى (الاياقتىق) بويىنشا سوتقا دەيىنگى تەرگەۋ تىركەلدى"، – دەلىنگەن باس پروكۋراتۋرانىڭ KazTAG رەداكسياسىنىڭ رەسمي سۇراۋىنا بەرگەن جاۋابىندا.
بۇعان دەيىن ۇقك قىزمەتكەرلەرى ەسىرتكى ساۋداسىنا قاتىستى ولجاس الييەۆ ەسىمدى ازاماتتى ۇستاعانى حابارلانعان. ول قىزىلوردا وبلىستىق پروكۋراتۋراسىنىڭ قىزمەتكەرى بولۋى مۇمكىن دەگەن بولجام ايتىلعان. سونىمەن قاتار ءدال سول وڭىردە ۇلىتاۋ وبلىسىنىڭ پروكۋراتۋراسىندا قىزمەت ەتەتىن سامات قانييەۆ ەسىمدى ازاماتتىڭ پارا الۋ كۇدىگىمەن ۇستالعانى تۋرالى اقپارات تاراعان.
