Prokýratýra QazMunaıGaz ben Nursultan Nazarbaevtyń bilim berý qoryn sotqa berdi. Sebebi prokýratýra Qazaqstandaǵy beldi ýnıversıtetti satý kezinde memleket múddesine nuqsan keldi dep esepteıdi, - dep habarlaıdy Dalanews.kz.
Bes.Media málimetinshe, prokýratýra 2018 jyly "QazMunaıGaz" kompanıasy men Nursultan Nazarbaevtyń bilim berý qory arasynda jasalǵan "Qazaqstan-Brıtan Tehnıkalyq Ýnıversıteti" AQ-ny satyp alý-satý shartyn zańsyz dep tanýdy suraǵan.
Aıta keteıik, QBTÝ Qazaqstannyń eks-prezıdenti Nursultan Nazarbaevtyń bastamasymen 2000 jyly Ulybrıtanıamen jasalǵan kelisim boıynsha qurylǵan. Alǵashynda quryltaıshysy Qazaqstan Respýblıkasynyń Úkimeti boldy. Muny sol kezdegi Bilim jáne ǵylym mınıstrligi usynǵan bolatyn. 2003 jyldan bergi quryltaıshy - "QazMunaıGaz" ulttyq kompanıasy. 2018 jyly jekeshelendirý aıasynda "Nursultan Nazarbaev Bilim berý qory" qoǵamdyq qory 11,3 mıllıard teńgege ýnıversıtettiń úlesin satyp aldy.
"Baǵalaý esebin tikeleı júrgizgen ókil retinde men memleketke 11 mıllıard teńge zalal keltirdi degen aıypty negizsiz dep sanaımyn", - dedi Baker Tilly aýdıtorlyq kompanıasynyń ókili.
Taraptar medıasıa kelisiminiń sharttaryn talqylaýǵa ýaqyt suraǵandyqtan sot isti toqtatty.
