Qazaqstanda memlekettik qyzmetshilerge jaza qoldanýdyń jańa erejeleri túsindirildi, dep habarlaidy Dalanews.kz.
Memlekettik qyzmet isteri agenttigi (MQIA) Qazaqstanda memlekettik qyzmetshilerge jaza qoldanýdyń jańa erejelerin túsindirdi. Jaqynda Memleket basshysy memlekettik qyzmet máseleleri boiynsha birqatar qujattarǵa ózgerister men tolyqtyrýlar engizgen bolatyn. Olardyń keibiri memlekettik qyzmetshilerge tártiptik jaza qoldanýǵa qatysty.
Tengrinews.kz redaktsiiasynyń resmi saýalyna bergen jaýabynda MQIA memlekettik qyzmetshilerdiń ákimshilik jáne saiasi bolyp bólinetinin aitty.
Saiasi memlekettik qyzmetshiniń qyzmeti saiasi baǵytty anyqtaidy jáne ol saiasi maqsattar men mindetterdi iske asyrýǵa jaýapty. Olardyń tártiptik jaýapkershiligin qaraý tártibi memlekettik qyzmetshilerge tártiptik jaza qoldaný erejelerinde kózdelgen. Bul erejeler 2015 jyly bekitilgen bolatyn.
Prezident Qasym-Jomart Toqaev osy tártipti retteý maqsatynda bul erejelerge ózgerister engizdi.
«Memleket basshysynyń Jarlyǵymen saiasi memlekettik qyzmetshilerge Prezidenttiń tapsyrmalaryn, sondai-aq Prezident Ákimshiligi basshylyǵynyń Prezident tapsyrmalary negizinde jáne (nemese) olardy oryndaý úshin berilgen tapsyrmalaryn oryndamaý nemese tiisti deńgeide oryndamaý úshin tártiptik jaza qoldanýdy kózdeitin naqtylaýshy sipattaǵy ózgerister men tolyqtyrýlar engizildi», – dep habarlady agenttik.
Aita ketý kerek, «Memlekettik qyzmet týraly» zańǵa sáikes, qyzmettik tártip pen etika normalaryn buzǵany úshin memlekettik qyzmetshilerge eskertý, sógis, qatań sógis, tolyq emes qyzmettik sáikestik týraly eskertý, memlekettik laýazymynan tómendetý (sailanbaly negizde jumys isteitin memlekettik qyzmetshilerdi qospaǵanda) jáne memlekettik laýazymnan bosatý siiaqty tártiptik jazalar qoldanylýy múmkin.
Eske salaiyq, buǵan deiin Memleket basshysy Qasym-Jomart Toqaev sonymen qatar memlekettik apparat jumysyn jetildirý sharalary týraly jarlyqtaryna ózgerister engizgen bolatyn.
Budan bylai Qazaqstan Respýblikasy Prezidentiniń nemese Prezident Ákimshiligi basshylyǵynyń tapsyrmalaryn oryndamaǵan saiasi memlekettik qyzmetshige tártiptik jaza qoldanylady.
2000 jylǵy Prezident jarlyǵyna sáikes, tártiptik jaza kelesi jaǵdailarda qarastyrylǵan:
- qyzmetshilerdiń ózderine júktelgen mindetterin zańsyz nemese durys oryndamaýy;
- laýazymdyq ókilettikterin asyra paidalanýy;
- memlekettik jáne eńbek tártibin buzýy;
- memlekettik qyzmetshilerdiń qyzmettik etika erejelerin buzýy;
- tártiptik jaza túrinde jazalanatyn sybailas jemqorlyq quqyqbuzýshylyq jasaýy;
- memlekettik qyzmet týraly zańda kórsetilgen shekteýlerdi nemese memlekettik qyzmetshilerdiń mindetterin oryndamaýy.
Budan bólek, qujatqa sáikes, ortalyq jáne jergilikti memlekettik organdarǵa memlekettik biýdjetten qarjylandyrylatyn uiymdardyń kadrlyq protsesterin “Biryńǵai kadrlyq júie” aqparattyq júiesi negizinde avtomattandyrýdy 2025 jyldyń 31 jeltoqsanyna deiin qamtamasyz etý tapsyryldy.
