– Memleket basshysy Twitter-degi paraqshasynda aǵylshyntildi aýdıtorıaǵa arnap, aǵylshyn tilinde onshaqty tvıt-jazba qaldyrdy. Óıtkeni shyny kerek, kóptegen álemdik qaýymdastyqtyń ókilderi bizdegi ahýaldy eń alǵash Mańǵystaýda bastalǵan beıbit sherý dep qabyldap júr. Soǵan qarsy oq atty degen pıǵyldan áli aınyǵan joq. Sol sebepti biz aqparat quraldaryna, ásirese sheteldik BAQ-qa kúl-talqan bolǵan Almatynyń, Tarazdyń, Shymkenttiń, Almaty oblysynyń kóshelerin, marqum bolǵandar týraly, zardap shekkenderdi kóbirek kórsetýimiz kerek. Óıtkeni olar bizdi beıbit halyqqa oq atty dep oılap otyr. Shyn mánisinde jetik deńgeıde uıymdasqan, arnaıy sodyrlyq jasaq daıyndyqpen kelgenin qazirgi tańda tergeý organdary anyqtap, aıtyp bere alady, – dedi Berik Ýálı.
Onyń aıtýynsha, Batystaǵy halyqaralyq qaýymdastyqtyń bul pikirin Prezıdenttiń aǵylshyn tilinde jazylǵan tvıt-jazbalary ózgertken.
– Shyny kerek, sol tvıt-jazbalar sheteldegi halyqaralyq uıymdar, sheteldegi áriptester tarapynan qoldaý taýyp, qazirgi tańda Prezıdent qabyldaǵan eldi sodyrlardan azat etý baǵytyndaǵy kontrterrorlyq operasıaǵa qoldaý bildirip jatqany ras. Biz tym-tyrys úndemeı otyrsaq, olar qaıdan biledi? Sol sebepti Memleket basshysy Premer-Mınıstrdiń orynbasarynyń jáne Syrtqy ister mınıstriniń mindetin atqarýshy Muhtar Tileýberdige naqty tapsyrma berdi. Osy baǵyttaǵy jumysty jandandyryp, sheteldik áriptesterge, Eýropaǵa, Batysqa osy jóninde naqty aqparatty, shynaıy, bolǵanyn bolǵandaı etip, qospasyz kórsetýge tapsyrma berdi. Qazir Syrtqy ister mınıstrligi sol baǵytta aýqymdy jumysty bastap ketti, – dedi Prezıdenttiń baspasóz hatshysy.
