Prezident Toqaev 6 cáýir 13:00-de halyqqa úndeýinde biylǵy sý tasqyny sońǵy 80 jyldaǵy eń iri apat ekenin aitty. Bul týraly Dalanews.kz habarlaidy.
Onyń atap ótkenindei, mundai aýqymdy apat buryn-sońdy bolmaǵan.
"Qurmetti otandastar, sizderge erigen qar sýynan keiingi sý tasqynynan týyndaǵan kúrdeli jaǵdaiǵa bailanysty hat joldap otyrmyn. Buryn-sońdy bolmaǵan tabiǵi apat oryn aldy. Bákim, bul – sońǵy 80 jyldaǵy eń iri apat shyǵar", – dedi ol halyqqa joldaýynda.
Memleket basshysy elimizdiń 10 oblysynda – Abai, Aqmola, Aqtóbe, Atyraý, Batys Qazaqstan, Qaraǵandy, Qostanai, Pavlodar, Soltústik Qazaqstan jáne Ulytaý oblystarynda jergilikti tótenshe jaǵdai rejimi engizilgenin atap ótti.
"Jaǵdai óte kúrdeli bolsa da, biz qiyndyqty mindetti túrde eńseremiz, barlyǵyn qalpyna keltiremiz. Eń bastysy – azamattardyń amandyǵy. Tasqyn sýdan zardap shekken azamattarǵa aitarym, memleket birde-bir adamdy eskerýsiz qaldyrmaidy. Barshańyzǵa qarjylyq jáne basqa da kómek beriledi. Materialdyq shyǵyndar tolyq óteledi. Biz alapat sý tasqynynan tiisti qorytyndy shyǵarýymyz kerek. Iaǵni, jiberilgen olqylyqtardy túzetip, tiisti sabaq alýymyz qajet. Al ondai sabaqtar az emes",- dedi Toqaev.
Aitýynsha, onyń tapsyrmasynan keiin sý tasqynynyń saldaryn azaitý jumystary kúsheiip, tiisti sharalar qabyldanǵan, premer-ministr Bektenov basqaratyn respýblikalyq shtab quryldy. Endi qorǵanys ministrligi qosymsha áskeri bólimder jiberedi.
“Úkimet basshysy da, onyń orynbasarlary da, Tótenshe jaǵdailar ministri de zardap shekken aimaqtardy aralap júr. Barlyq jergilikti qutqarý jumystary meniń jeke baqylaýymda. Jaǵdai qiyn, biraq úmit úzýdiń qajeti joq, bul jaǵdaidy túzetemiz. Eń bastysy – adam shyǵynynyń aldyn alý”, – dedi Memleket basshysy.
Prezident sý tasqynynan zardap shekken azamattar memlekettiń nazarynan tys qalmaitynyn jáne barlyq materialdyq shyǵyn óteletinin atap ótti.
Sonymen qatar buqaralyq aqparat quraldaryna, belsendi azamattarǵa jáne blogerlerge jurtty dúrbeleńge salatyn jalǵan aqparattardy taratpaý qajettigin eske saldy.
"Qazirgi ýaqytta bilik pen qoǵamdy uiystyratyn áreketter jasaý asa mańyzdy. Azamattardy tek qana resmi aqparat kózderine súienýge shaqyramyn",- dedi Toqaev.
