"Memleket basshysy Qasym-Jomart Toqaevtyń týrizm salasyna aitqan qatań syny sheneýnikterdi aiaq astynan dúr etkizdi. Buǵan deiin de berilgen tapsyrmalardy nazardan tys qaldyryp kelgen memlekettik apparat endi jappai otandyq týrizmdegi kemshilikterdi túzetýge kirise qalypty". Saiasattanýshy Daniiar Áshimbaev osylai dep pikir bildirdi, dep habarlaidy Dalanews.kz.
"Prezidenttiń tapsyrmasyn oryndaýǵa tym qatty ekpin berilgendikten, basqa jumystar ekinshi josparǵa ysyryldy. Buryn berilgen ózge tapsyrmalar da umytyldy. Qazir bári demalys oryndaryndaǵy bylyqty retteýge "erlikpen" kirisip ketkendei áser qaldyrady. Al osy salaǵa naqty jaýapty vitse-premer, ministr, orynbasar, komitet tóraǵasy, ákimder men basqarma basshylary bar emes pe? Olar bul jumystarmen burynnan-aq ainalysýǵa mindetti emes pe? Nátijesinde, taǵy da memlekettik apparattyń júieli jumysynyń joqtyǵy bilinip qalýda", – deidi saiasattanýshy.
Aita ketsek, buǵan deiin Prezident Qasym-Jomart Toqaev elimizdegi týrizmniń jaǵdaiyn synǵa alǵan bolatyn. Ásirese, Alakól jaǵalaýyndaǵy týristik infraqurylymdardyń nasharlyǵyn, servistiń tómendigin jáne qaýipsizdiktiń qamtamasyz etilmegeni sózge qaldy. Óz kezeginde premer-ministr Oljas Bektenov bul kemshilikterdiń Úkimettiń jumysynyń olqylyǵy ekenin moiyndaǵan edi.
