Búgin Memleket basshysy Qasym-Jomart Toqaev barlyq deńgeidegi máslihat depýtattarynyń II respýblikalyq forýmynda respýblikalyq biýdjettiń kiris bóligi tolyq oryndalmai jatqanyn synǵa aldy,dep jazady Dalanews.kz.
Prezident qazir jańa Biýdjet jáne Salyq kodeksteri ázirlenip jatqanyn eske saldy.
"Onda jergilikti ózin-ózi basqarýǵa qatysty reformanyń erekshelikteri eskerilýge tiis. Úkimet aýyl ákimderiniń biýdjetin qalyptastyrý jáne ony jumsaý tásilderin qaita qaraýy kerek. Jergilikti ózin-ózi basqarý júiesiniń qarjylyq derbestigin arttyrý úshin naqty usynystar ázirleýi qajet. Kodeks jobalaryn talqylaýǵa máslihattar belsene qatysqany jón. Jergilikti biýdjet qarjysynyń durys ári tiimdi bólinýi óte mańyzdy. Depýtattar bul máselege zor jaýapkershilikpen qaraýǵa tiis. Máslihattar biýdjet saiasatyn, túrli tólemderdiń shekti mólsherin, eldi mekenderdi abattandyrý jaiyn, basqa da máselelerdi udaiy baqylaýda ustaýy qajet", - dedi Prezident.
Degenmen bul rette Memleket basshysy respýblikalyq biýdjettiń kiris bóligi tolyq oryndalmai jatqanyn synǵa aldy.
"Men Joldaýda Úkimet pen Ulttyq bankke osyǵan qatysty naqty sharalar qabyldaýdy tapsyrdym. Sebebi, bul – jalpyulttyq mindet. Oǵan barlyq deńgeidegi bilik tarmaqtary kúsh jumyldyrýǵa tiis. Biz "Qýatty aimaqtar – qýatty el" qaǵidatyna sai jumys isteýimiz kerek. Sizder munyń mańyzy zor ekenin jaqsy bilesizder. Sondyqtan ár depýtat óz aýdanyn órkendetýge atsalysady dep senemin", - dedi Qasym-Jomart Toqaev.
Prezidenttiń aitýynsha, máslihattar jalpyulttyq mindetterdi júzege asyrýǵa úles qosýy kerek.
"Byltyr meniń tóraǵalyǵymmen ótken elimizdiń áleýmettik-ekonomikalyq damýyna arnalǵan keńeitilgen keńeske kóptegen depýtattar qatysty. Mundai jiyn aldaǵy ýaqytta da ótip turady. Sebebi reformalardy óńirlerde iske asyrýda máslihattardyń orny airyqsha. Máslihattardyń memlekettik jáne qoǵamdyq mindetterdi júzege asyrýǵa etene aralasýy, ózderi túrli bastama kóterýi mańyzdy. Osy oraida Amanat partiiasynyń qoǵamdaǵy ózekti máselelerdi sheshýge baǵyttalǵan jobalaryn erekshe atap ótkim keledi", - dedi ol.
Sondyqtan Prezident jastarǵa, áielderge, kásipkerlerge, zeinetkerlerge, erekshe qajettilikteri bar adamdarǵa qoldaý kórsetý, halyqtyń qaryz júktemesin azaitý, aýyl turǵyndarynyń kirisin arttyrý, paidalanylmai jatqan jáne zańsyz berilgen jerlerdi qaitarý, ekologiialyq, qarjylyq saýattylyqty jetildirý, sondai-aq qoǵamdaǵy oqý mádenietin qalyptastyrý siiaqty jobalar – airyqsha nazar aýdarýdy qajet etetin ózekti máseleler ekenin basa atap ótti.
"Men Úkimetke "Qaryzsyz qoǵam" jáne "Aýyl amanaty" sekildi partiialyq jobalardyń aýqymyn keńeitýge kómektesýdi tapsyrdym.Memleket adal eńbegimen turmysyn jaqsartýǵa daiyn jandarǵa árqashan qoldaý kórsetedi. Bul "Adal eńbek – Adal tabys" qaǵidasyna tolyq sáikes keledi jáne Ádiletti Qazaqstan qurýdyń negizgi faktorlarynyń biri. Sondyqtan kelesi jyldy Jumysshy mamandyqtar jyly dep jariialadym. Osy arqyly qoǵamda eńbek qundylyǵy men kásibi biliktiliktiń ornyǵýyna yqpal etemiz dep senemin", - deidi Prezident.
