Memleket basshysy Qasym-Jomart Toqaev qazaqstandyqtardy Otan qorǵaýshy kúnimen quttyqtap, el qaýipsizdigin kúzetip júrgen áskeri qyzmetkerlerge alǵys aitty, dep habarlaidy dalanews.kz.
Prezident óz quttyqtaýynda bul merekeniń memlekettik ári qoǵamdyq mańyzy erekshe ekenin atap ótti. Onyń aitýynsha, bul kúni jaýyngerlerdiń erligi, rýhy men qaisarlyǵy dáripteledi.
«Bul – Qazaqstannyń qaýipsizdigin, turaqtylyǵy men tynyshtyǵyn kúndiz-túni qas qaqpai kúzetken, sondai-aq qazir Otan aldyndaǵy boryshyn adal ótep jatqan barsha azamatqa qurmet kórsetiletin kún», - dedi Toqaev.
Memleket basshysy qazaqstandyq áskeri qyzmetkerler batyr babalardyń jolyn jalǵastyryp kele jatqanyn aitty.
Prezident sardarlar men sarbazdardyń halyqaralyq missiialardaǵy, oqý-jattyǵýlar men jarystardaǵy kásibi daiyndyǵyna da toqtaldy.
«Sardarlar men sarbazdardyń, barlyq kúshtik qurylym qyzmetkerleriniń bitimgerlik missiialar, arnaýly oqý-jattyǵý jiyndary men túrli halyqaralyq saiystar kezindegi kásibi sheberligi, temirdei tártibi men jaýyngerlik daiarlyǵy – sonyń aiqyn dáleli», - dedi ol.
Toqaev Qazaqstan armiiasy kez kelgen kúrdeli mindetti oryndaýǵa daiyn ekenin málimdep, memleket qorǵanys qabiletin kúsheitýge jáne áskeri qyzmetshilerdiń áleýmettik jaǵdaiyn jaqsartýǵa basymdyq beretinin jetkizdi.
Sonymen qatar Prezident Konstitýtsiiada kórsetilgen Otandy qorǵaý ár azamattyń qasietti paryzy ekenin eske saldy.
«Biz Otanǵa qaltqysyz qyzmet etý qaǵidatyn jáne Konstitýtsiiada aiqyndalǵan myzǵymas qundylyqtardy negizge ala otyryp, san ǵasyrlyq tarihy bar memlekettiligimizdiń tuǵyryn nyǵaita túsemiz», - dedi Memleket basshysy.
Qasym-Jomart Toqaev áskeri antqa adal bolyp júrgen azamattarǵa rizashylyǵyn bildirip, qazaqstandyqtarǵa densaýlyq, amandyq jáne tabys tiledi.
