9 naýryz tańerteń Nur-Sultan men Almatydaǵy aqsha aiyrbastaý pýnkterinde dollar 397 teńgeden satyla bastaǵan. Keiin tús aýa Nur-Sultan men Almatydaǵy keibir aqsha aiyrbastaý oryndary dollar satýdy toqtatty. Dúisenbi – elde jumys kúni emes (8 naýryzdaǵy mereke jeksenbige kelgendikten dúisenbi demalys dep jariialanǵan), sondyqtan Qazaqstan qarjy fondynda valiýtalyq saýda júrip jatqan joq.
Prezident Úkimetke, Ulttyq bankke jáne basqa da memlekettik organdarǵa birqatar naqty tapsyrma berdi.
Basty tapsyrma – memlekettiń halyq aldyndaǵy barlyq áleýmettik mindettemelerin tolyq kólemde oryndaý. Qasym-Jomart Toqaevtyń tapsyrmasy boiynsha, Premer-ministrdiń tikelei basshylyǵymen Shuǵyl áreket etý shtaby quryldy.
Daǵdarysqa qarsy is-qimyldar jospary ázirlenedi, iri kásiporyndarda halyqty jumyspen qamtýǵa qoldaý kórsetý jóninde arnaiy jospar daiyndalady. Prezident halyqty múmkindiginshe kóbirek jumyspen qamtý máselesin asa mańyzdy dep sanaidy.
Úkimet 2020-2022 jyldarǵa arnalǵan respýblikalyq biýdjetti naqtylaý jóninde usynys engizedi. Memleket basshysy biýdjet shyǵyndaryn qysqartý, óńirlerde halyqty jumyspen qamtamasyz etý, elimizdiń qarjy-valiýtalyq naryǵyn turaqtandyrý, respýblikalyq jáne jergilikti biýdjetterdi ońtailandyrý boiynsha sharalar qabyldaý qajettigin aitty.
Keiin Toqaev Twitter paraqshasynda shtabty Premer-ministr Asqar Mamin basqaratynyn, memleket qosymsha jumys oryndary ashylatynyn jazdy.
Ótken aptanyń sońynda Venada OPEK, Saýd Arabiiasy jáne Resei munai baǵasyn ustap turý úshin óndiristi azaitýǵa kelissóz júrgizgen. Biraq Venadaǵy jiynda taraptar kelise almady. Kreml OPEK usynysyn qoldamady. Osydan soń Saýd Arabiiasy "baǵa soǵysyn" bastap, Aziia úshin munai baǵasyn barreline úsh-tórt dollarǵa, AQSh úshin jeti dollarǵa deiin túsirip jiberdi.
Dúisenbide Resei rýbli de 2016 jylǵy rekordtyq deńgeiine túsip, bir dollar 72,72 rýbl boldy.
9 naýryzda Brent markaly munai barreline 36 dollardan satylyp jatyr. 2014 jylǵy saýda soǵysy kezinde bul brend baǵasy 30 dollarǵa deiin quldyraǵan. Munai baǵasynyń túsýinen Reseide biýdjet defitsiti bolyp, rýbl arzandaýy múmkin.
Resei ekonomikasynyń Qazaqstan ekonomikasyna yqpaly bar. Sebebi Qazaqstan Reseidiń ekonomikalyq seriktesi ári Máskeý basqaratyn Eýraziialyq ekonomikalyq odaqqa kiredi. Budan bólek, munai Qazaqstan ekonomikasynyń negizgi tabys kózi sanalady. Munai baǵasy quldyrasa, teńge qunsyzdanyp, dollarǵa shaqqandaǵy quny kóterilip ketedi. Osynyń saldarynan elde azyq-túlik baǵasy da óse bastaidy.
