Álemdik naryqta munai baǵasy Taiaý Shyǵystaǵy jaǵdaidyń qaita ýshyǵýyna bailanysty qaita qymbattai bastady, dep habarlaidy dalanews.kz.
Londondaǵy ICE Futures birjasynda Brent markaly munaidyń shilde aiyndaǵy fiýchersteri barreline 1,29 dollarǵa ósip, 101,35 dollarǵa jetti. Bir kún buryn Brent baǵasy kerisinshe 1,2 paiyzǵa arzandap, 100,06 dollar bolǵan edi.
Al Niý-Iork taýar birjasyndaǵy WTI munaiynyń maýsym aiyndaǵy fiýchersteri 1,05 dollarǵa qymbattap, barreline 95,86 dollar boldy. Aldyńǵy sessiiada WTI baǵasy 94,81 dollarǵa deiin tómendegen.
Buǵan deiin munai baǵasy AQSh pen Iran arasyndaǵy shielenistiń báseńdeýi múmkin degen signaldardan keiin birden 5 dollarǵa deiin arzandaǵan bolatyn.
Soǵan qaramastan Brent pen WTI markalary osy aptany jalpy alǵanda 6 paiyzdan astam tómendeýmen aiaqtap jatyr.
