Jıyn barysynda senatorlar Elbasy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynyń basym baǵyttaryna jeke-jeke toqtalyp, mańyzdylyǵyn túsindirdi. Sondaı-aq sóz sóıleýge shyqqan aýdandyq qoǵamdyq keńes tóraǵasy Q.Anashev, «Bes jal» ÓK tóraǵasy Á.Saparov pen aýdandyq «Jastar resýrstyq ortalyǵynyń» belsendisi, «Jasyl el» jastar eńbek jasaqtary aýmaqtyq shtabynyń jetekshisi I.Jolbashanov Joldaýda aıtylǵan jańalyqtardy qýana qarsy alǵandaryn aıta otyryp, osy qujattyń arqasynda elimizdiń halqynyń ál-aýqaty birshama jaqsaryp, bolashaqqa nyq qadam basýǵa talpynys beretinin tilge tıek etti. Túlkibas aýdanynyń ákimi Nurbol Turashbekov aýdannyń tynys-tirshiligimen tanystyryp, el jaǵdaıyn jaqsartý baǵytynda jumystar jalǵasatynyn aıtty.
Osy kúni senatorlar Saıram aýdany turǵyndarymen de júzdesti.
Jıynda QR Parlamenti Senatynyń depýtaty Álı Bektaev bıylǵy Joldaýdyń halyqtyń ál-aýqatyn arttyrýǵa baǵyttalǵanyn málimdep, «Bıznestiń jol kartasy – 2020» baǵdarlamasynyń ne sebepten taǵy da 5 jylǵa uzartylǵanyn túsindirip ótti. Onyń aıtýynsha, atalǵan baǵdarlama óziniń ómirsheńdigin dáleldegen. Iaǵnı, baǵdarlamanyń arqasynda elimizde talaı kásipker nesıe alǵan. Nátıjesinde kóptegen kásipkerlik sýbektileri iske qosylyp, myńdaǵan jumys oryndary ashylǵan.
Saıram aýdanynyń ákimi Baqtıar Mamaev Joldaýdyń aýdan turǵyndaryna serpin beretinin jetkizdi. Jıynǵa qatysýshylar óz pikirlerin ortaǵa salyp, Elbasynyń Joldaýyn úlken yqylaspen qoldaıtyndyqtaryn jáne óz úlesterin qosatyndaryn aıtty.
Aldaǵy ýaqytta QR Parlamenti Senatynyń depýtattary bastaǵan top Joldaýdy nasıhattaý maqsatynda Tólebı, Ordabasy, Qazǵurt pen Otyrar aýdandarynyń turǵyndarymen kezdesedi dep kútilýde.
Túrkistan oblysy ákiminiń baspasóz qyzmeti
