Memleket basshysy eńbek jáne halyqty áleýmettik qorǵaý ministri Asqarbek Ertaevty qabyldady, dep habarlaidy Dalanews.kz.
Prezidentke vedomstvo qyzmetiniń biylǵy basym baǵyttary jóninde baiandaldy.
Qasym-Jomart Toqaevqa halyqty jumyspen qamtý jospary jóninde málimet berildi. Ýaqytsha sharalardan góri turaqty jáne sapaly jumys oryndaryn ashý, eńbek utqyrlyǵyn arttyrý jáne bilim berý júiesi men naryq suranysy arasynda tyǵyz bailanys ornatý josparlanyp otyr. Jastardy, sonyń ishinde NEET sanatyndaǵy azamattardy jumyspen qamtýǵa basa mán beriledi.
Memleket basshysyna ataýly áleýmettik kómek júiesin odan ári jetildirý jospary tanystyryldy. Ministrlik tsifrlyq baǵalaý quraldary arqyly qoldaý sharalarynyń naqty adresine jetý múmkindigin keńeitýge nietti. Sonymen qatar kómek alatyn ári eńbekke jaramdy azamattardy mindetti túrde jumyspen qamti otyryp, áleýmettik kelisimshart tájiribesin keńeitýdi kózdep otyr.
Prezidentke zeinetaqy júiesiniń uzaq merzimdi turaqtylyǵyn qamtamasyz etý jáne zeinetaqy tólemderiniń laiyqty deńgeiin saqtaý jóninde aityldy.
Múgedektigi bar tulǵalardy áleýmettik turǵydan qorǵaý máselelerine basa nazar aýdaryldy. Ministrlik arnaýly áleýmettik qyzmetterdi jan basyna qarai qarjylandyrý tetigin odan ári damytýdy, olardyń sapa standarttaryn arttyrýdy, ońaltý qyzmetteri men tehnikalyq quraldardy qoljetimdi etýdi josparlap otyr. Sonymen qatar inkliýzivti jumys oryndaryn ashýǵa den qoiady.
Ministr Kóshi-qon saiasatynyń 2030 jylǵa deiingi tujyrymdamasyn iske asyrý jónindegi is-qimyl jospary jaiynda aqparat berdi. Kóshi-qon úderisin basqarý jáne boljaý deńgeiin jaqsartý, ishki migratsiiany teńgerimdi júrgizý, eldegi eńbek naryǵyn qorǵaýǵa basymdyq bere otyryp, eńbek kóshi-qonyn retteýdi jetildirý kózdelgen.
Memleket basshysy halyqty jumyspen qamtý, azamattardyń tabysyn ulǵaitý, áleýmettik qoldaýdyń shyn muqtaj jandarǵa jetýin baqylaýdy kúsheitý, zeinetaqy júiesin jetildirý, teńgerimdi kóshi-qon saiasatyn iske asyrý, áleýmettik qorǵaýda inkliýzivti tásilderdi damytý, sondai-aq tsifrlyq sheshimderdi qoldaný arqyly eńbekti qorǵaý júiesin nyǵaitý jáne qaýip-qaterlerdiń aldyn alý boiynsha birqatar tapsyrma berdi.
