Prezıdent Eýropadaǵy qaýipsizdik jáne yntymaqtastyq uıymynyń Bas hatshysy Ferıdýn Sınırlıoǵlyny qabyldady, dep habarlaıdy Dalanews.kz.
Memleket basshysy Óńirlik ekologıalyq samıttiń jumysyna belsene qatysqany úshin Ferıdýn Sınırlıoǵlyǵa rızashylyǵyn bildirip, bul platforma Ortalyq Azıa men kórshi aımaqtarǵa ortaq ekologıalyq máselelerdi sheshý jolyn birlesip izdeýdi kózdeıtinin aıtty.
Qasym-Jomart Toqaev pen Ferıdýn Sınırlıoǵly ornyqty damý, klımattyń turaqtylyǵy, sý resýrstaryn tıimdi basqarý jáne ózara ekonomıkalyq baılanysty keńeıtý salalaryndaǵy yqpaldastyqty damytýǵa nıet tanytty.
Prezıdent elimiz EQYU-men barlyq úsh ólshem boıynsha yntymaqtastyqty nyǵaıtýǵa beıil ekenin rastady. Uıymmen aradaǵy seriktestik 2010 jyly ótken EQYU samıtiniń Astana deklarasıasy qaǵıdattaryna negizdelgenin atap ótti.
Qasym-Jomart Toqaev adam quqyqtary, demokratıa men zań ústemdigi ulttyq basymdyq retinde qarastyrylatynyna nazar aýdardy.
Prezıdenttiń aıtýynsha, elimiz Ádiletti Qazaqstan qurý jolynda aýqymdy saıası jáne ınstıtýsıonaldyq jańǵyrý baǵdarlamasyn iske asyryp jatyr.
Jaqynda ótken referendým men jańa Konstıtýsıanyń qabyldanýy elimizdiń saıası júıesin jańartýdaǵy mańyzdy kezeń sanalady. Qolǵa alynǵan reformalar zań ústemdigin nyǵaıtýdy, bılik ınstıtýttarynyń eseptiligin arttyrýdy jáne memleketti basqarýdyń ornyqty modelin qalyptastyrýdy kózdeıdi.
Ferıdýn Sınırlıoǵly Óńirlik ekologıalyq samıtke shaqyrǵany úshin Qasym-Jomart Toqaevqa alǵys aıtyp, Ortalyq Azıa men odan tysqary jerlerdegi klımat jáne ekologıa kún tártibin qalyptastyrýdaǵy Qazaqstannyń róline joǵary baǵa berdi. Sonymen qatar Bas hatshy elimizdiń Uıym jumysyna erekshe úles qosyp otyrǵanyn jetkizdi.
Qasym-Jomart Toqaev pen Ferıdýn Sınırlıoǵly óńirlik jáne aımaqtyq kún tártibindegi ózekti máseleler jóninde pikir almasty.
