پرەزيدەنت ەۋروپاداعى قاۋىپسىزدىك جانە ىنتىماقتاستىق ۇيىمىنىڭ باس حاتشىسى فەريدۋن سينيرليوعلىنى قابىلدادى، دەپ حابارلايدى Dalanews.kz.
مەملەكەت باسشىسى وڭىرلىك ەكولوگيالىق ءسامميتتىڭ جۇمىسىنا بەلسەنە قاتىسقانى ءۇشىن فەريدۋن سينيرليوعلىعا ريزاشىلىعىن ءبىلدىرىپ، بۇل پلاتفورما ورتالىق ازيا مەن كورشى ايماقتارعا ورتاق ەكولوگيالىق ماسەلەلەردى شەشۋ جولىن بىرلەسىپ ىزدەۋدى كوزدەيتىنىن ايتتى.
قاسىم-جومارت توقايەۆ پەن فەريدۋن سينيرليوعلى ورنىقتى دامۋ، كليماتتىڭ تۇراقتىلىعى، سۋ رەسۋرستارىن ءتيىمدى باسقارۋ جانە ءوزارا ەكونوميكالىق بايلانىستى كەڭەيتۋ سالالارىنداعى ىقپالداستىقتى دامىتۋعا نيەت تانىتتى.
پرەزيدەنت ەلىمىز ەقىۇ-مەن بارلىق ءۇش ولشەم بويىنشا ىنتىماقتاستىقتى نىعايتۋعا بەيىل ەكەنىن راستادى. ۇيىممەن اراداعى سەرىكتەستىك 2010 جىلى وتكەن ەقىۇ ءسامميتىنىڭ استانا دەكلاراسياسى قاعيداتتارىنا نەگىزدەلگەنىن اتاپ ءوتتى.
قاسىم-جومارت توقايەۆ ادام قۇقىقتارى، دەموكراتيا مەن زاڭ ۇستەمدىگى ۇلتتىق باسىمدىق رەتىندە قاراستىرىلاتىنىنا نازار اۋداردى.
پرەزيدەنتتىڭ ايتۋىنشا، ەلىمىز ادىلەتتى قازاقستان قۇرۋ جولىندا اۋقىمدى ساياسي جانە ينستيتۋسيونالدىق جاڭعىرۋ باعدارلاماسىن ىسكە اسىرىپ جاتىر.
جاقىندا وتكەن رەفەرەندۋم مەن جاڭا كونستيتۋسيانىڭ قابىلدانۋى ەلىمىزدىڭ ساياسي جۇيەسىن جاڭارتۋداعى ماڭىزدى كەزەڭ سانالادى. قولعا الىنعان رەفورمالار زاڭ ۇستەمدىگىن نىعايتۋدى، بيلىك ينستيتۋتتارىنىڭ ەسەپتىلىگىن ارتتىرۋدى جانە مەملەكەتتى باسقارۋدىڭ ورنىقتى مودەلىن قالىپتاستىرۋدى كوزدەيدى.
فەريدۋن سينيرليوعلى وڭىرلىك ەكولوگيالىق سامميتكە شاقىرعانى ءۇشىن قاسىم-جومارت توقايەۆقا العىس ايتىپ، ورتالىق ازيا مەن ودان تىسقارى جەرلەردەگى كليمات جانە ەكولوگيا كۇن ءتارتىبىن قالىپتاستىرۋداعى قازاقستاننىڭ رولىنە جوعارى باعا بەردى. سونىمەن قاتار باس حاتشى ەلىمىزدىڭ ۇيىم جۇمىسىنا ەرەكشە ۇلەس قوسىپ وتىرعانىن جەتكىزدى.
قاسىم-جومارت توقايەۆ پەن فەريدۋن سينيرليوعلى وڭىرلىك جانە ايماقتىق كۇن تارتىبىندەگى وزەكتى ماسەلەلەر جونىندە پىكىر الماستى.
