2025 jyly 15 naýryzda Memleket basshysy Qasym-Jomart Toqaev Qazaqstan Respýblikasynyń Biýdjet kodeksine qol qoidy, dep habarlaidy Dalanews.kz.
Kodekstiń birinshi blogy memlekettik qarjy týraly erejelerge sai salyq-biýdjet, aqsha-nesie jáne fiskaldy saiasatty bailanystyrýǵa baǵyttalǵan, dep naqtylaidy Aqordanyń baspasóz qyzmeti.
Ekinshi blok memlekettik organdardyń derbestigi men jaýapkershiligin arttyra otyryp, biýdjet protsesin ońtailandyrdy. Biýdjet protsesteriniń merzimderi men kezeńderi qysqartyldy. Biýdjettik baǵdarlamalar ákimshileriniń ókilettikteri men jaýapkershiligin edáýir keńeitý esebinen bloktyq biýdjet elementteri engizildi.
Memlekettik organdarǵa biýdjettik baǵdarlama shyǵystarynyń 15 paiyzy kólemindegi qarajatty derbes basqarý quqyǵy berildi. Memlekettik organdar biyl jumsalmaǵan biýdjet qarjysyn kelesi jyldyń qańtar aiynan bastap paidalana alady. Bul shyǵystardy úzdiksiz qarjylandyrýǵa múmkindik beredi.
Úshinshi blok parlamenttik baqylaýdy kúsheitýge arnalǵan. Memlekettik kepildikterdi, memleket kepilgerlikterin berý limitin, úkimettik borysh limitin jáne jergilikti atqarýshy organdar boryshyn, kvazimemlekettik sektor sýbektileriniń syrtqy qaryz limitin Parlament qarastyryp, biýdjet týraly zańmen bekitedi.
Tórtinshi blok biýdjettiń kiris bóligin josparlaý sapasyn arttyrý jáne biýdjet qarjysyn tiimdi paidalaný jóninde pármendi sharalar qabyldaýdy kózdeidi. Kodekste kvazimemlekettik sektor sýbektilerine qatysty memlekettik dividend saiasatynyń negizgi erejeleri belgilengen.
Besinshi blok jinaq fýnktsiiasyna basa nazar aýdara otyryp, Ulttyq qordy paidalaný sharttaryn belgileidi. Ulttyq qordy paidalaný Prezident bekitken maqsatty baǵdarlarmen shekteledi. Qordyń qarajatyn ishki qarjy quraldaryna salýǵa ruqsat etilmeidi. Bul aqshany biýdjetten tys paidalanýǵa jol bermeidi. Ulttyq qordyń nysanaly transferti tek jalpyhalyqtyq mańyzy bar nysandar men jobalardy qarjylandyrýǵa ǵana paidalanylady. Ol úshin tiisti kriteriiler engizildi.
Altynshy blok kvazimemlekettik sektor sýbektileriniń boryshyn qosa alǵanda, memlekettiń qaryz saiasatyna baqylaýdy keńeitýge baǵyttaldy. Ýákiletti organdar memlekettik sektordyń boryshtyq mindettemelerine boljaý, monitoring jáne baǵalaý júrgizý sharalaryn júzege asyrady. Kvazimemlekettik sektordyń syrtqy borysh limiti respýblikalyq biýdjet týraly zańmen belgilenedi.
Túzetýlerdiń jetinshi blogy biýdjetaralyq qatynastardy jetildire tústi. Azamattardy biýdjet qarajatyn bólý protsesine belsendi tartý úshin halyq qatysatyn biýdjet tártibi zańnamalyq negizde bekitilgen.
Biýdjet kodeksiniń mátini baspasózde jariialanady.
