Memleket basshysy Qasym-Jomart Toqaev Túrkistan oblysyna jasaǵan jumys sapary barysynda kóne shaharda boı kótergen «Dostyq úıiniń» jumysymen tanysty, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Prezıdent tapsyrmasymen arnaıy salynǵan keshende «Qoǵamdyq kelisim» mekemesi, oblystyq Qazaqstan halqy Assambleıasy janyndaǵy Ardagerler keńesi, Analar keńesi, Medıasıa keńesi, sondaı-aq aımaqtaǵy 11 etnomádenı birlestiktiń ókildikteri ornalasqan.

Memleket basshysy ǵımaratty aralap kórip, jergilikti zıaly qaýymmen jáne Qazaqstan halqy assambleıasynyń múshelerimen júzdesti.

– Qasterli Túrkistan jerine arnaıy kelip otyrmyn. Túrkistan óńiriniń keleshegi jarqyn dep oılaımyn. Jastarymyzǵa úlgi-ónege kórsetip júrgen ardagerlerge alǵys aıtqym keledi. Eń aldymen, jastarǵa qoldaý bildirýimiz kerek. Biz bárimiz birigip, el úshin eńbek etýimiz qajet. Syrttan keletin táýekelder az emes. Ahýaldy jaqsy bilesizder. Túrkistan oblysynda 50 ult ókili turady. Aýyzbirshilikti saqtaý jáne elimizdi damytý jolyndaǵy eren eńbekterińizge rızashylyq bildiremin. Qazaqstanda eshqashan eshqandaı fobıa bolǵan emes, bolmaıdy da. Biz – birligi myǵym, tolerantty, ustamdy ári eńbekqor halyqpyz. Eń bastysy – osy. Sondyqtan yntymaǵy jarasqan qoǵamnyń irgesin áli de bekite túsemiz, – dedi Qasym-Jomart Toqaev.

Memleket basshysy Túrkistannyń kórikti, taza qalaǵa aınalǵanyna nazar aýdardy. Bul rette Túrkistanǵa oblys mártebesin bergen elimizdiń Tuńǵysh Prezıdenti Nursultan Nazarbaevtyń eńbegi zor ekenin atap ótti.

Kezdesýde Aqsaqaldar keńesiniń tóraǵasy Sozaqbaı Ábdiqulov Túrkistannyń oblysqa aınalǵan sátinen beri oryn alǵan oń ózgeristerge toqtalyp, halyq sany tyǵyz ornalasqan óńirge memleket tarapynan jasalyp jatqan qamqorlyq úshin alǵys aıtty.