Memleket basshysy Qasym-Jomart Toqaevtyń qabyldaýynda bolǵan Almaty qalasy ákimi Erbolat Dosaev biylǵy jyldyń 9 aidaǵy áleýmettik-ekonomikalyq damýynyń aldyn ala qorytyndysy baiandady. Erbolat Dosaevtyń aitýynsha, esepti kezeńde qysqamerzimdi ekonomikalyq indikator 104,1 paiyzdy qurady. 2024 jyly Almatynyń óńirlik jalpy ónimi 5,5 paiyz deńgeiine jetip, kelesi jyly 6,4 paiyzǵa deiin ósedi dep boljanyp otyr, – dep habarlaidy Dalanews.kz Almaty qalasy ákiminiń baspasóz qyzmetine silteme jasap.
Biylǵy 9 aidyń qorytyndysy boiynsha negizgi kapitalǵa 1 133 milliard teńge investitsiia tartylyp, ósim 8,1 paiyzǵa jetken. Jyl sońyna deiin 2 trillion teńge investitsiia tartylady.
Prezidentke jergilikti biýdjet kiristeri 27,2 paiyzǵa artqany jóninde málimet berildi. Bul Almaty qalasyn 2025 jylǵa deiingi damytý baǵdarlamasy jáne 2030 jylǵa deiingi orta merzimdi perspektivalary aiasynda basymdyq berilgen jobalardy qarjylandyrý kólemin ulǵaitýǵa múmkindik berdi. Jyl basynan beri qala biýdjeti 204,5 milliard teńgege artyp, 1828,5 milliard teńgeni qurady.
Memleke basshysynyń tapsyrmasyna sáikes, shaǵyn jáne orta biznesti órkendetýge den qoia otyryp, ekonomikany ártaraptandyrý jumystary jalǵasady. Kásipkerlik sýbektiler sany 6,2 paiyzǵa ósip, 361,1 myńǵa jetti. Jyl qorytyndysy boiynsha Almatynyń óńirlik jalpy ónim kórsetkishindegi shaǵyn jáne orta kásipkerlik úlesi 60 paiyzǵa deiin artady.
Prezident tapsyrmasyn oryndaý maqsatynda qalanyń damýyn sapaly qamtamasyz etýge jáne tiimdi baqylaýǵa arnalǵan Qala qurylysy reglamenti, Qurylys júrgizý erejesi jáne Turǵyn úidi renovatsiialaý baǵdarlamasynyń jańa jobasy ázirlendi. Ózgerister jyl sońyna deiin qalalyq máslihattyń sessiiasynda bekitiledi.
Qasym-Jomart Toqaevqa biyl densaýlyq saqtaý infraqurylymyn jańǵyrtýǵa arnalǵan biýdjet 2,5 ese ósip, 26,3 milliard teńgege jetkeni týraly esep berildi. Tamyz aiynda elimizdegi alǵashqy Erte aralasý ortalyǵy ashyldy. Bul mekeme vedomstvoaralyq is-qimyldy úilestirip, balalar arasyndaǵy múgedektikti tómendetýmen shuǵyldanady.
Ákimniń aitýynsha, basym baǵyttyń biri – injenerlik infraqurylymdy jańartý. Esepti kezeńde 219 shaqyrym sýmen jabdyqtaý jáne sý tartý jelileri salynyp, qoldanystaǵy 27,3 shaqyrym jeli jańartyldy. Budan bólek, 66 shaqyrym elektrmen jabdyqtaý jelisi rekonstrýktsiialandy.
Memleket basshysyna Almatynyń jasyl jelegin kóbeitý jónindegi tapsyrmasynyń oryndalý barysy baiandaldy. Oǵan kútim jasaý úshin 110 shaqyrym tamshylatyp sýarý júiesi ornatylǵan. Jyl sońyna deiin saiabaqtardyń aýdany 996 gektarǵa deiin keńeiedi.
Prezident Qasym-Jomart Toqaev kezdesý sońynda qala ekonomikasyndaǵy shaǵyn jáne orta biznes úlesin arttyrý, transport qurylymyn damytý jáne qoǵamdyq kólikterdi ekologiialyq talaptarǵa sáikestendirý, sondai-aq injenerlik jáne áleýmettik infraqurylymdy sapaly jańǵyrtý jóninde birqatar naqty tapsyrma berdi.
