Qazaqstan prezidenti Qasym-Jomart Toqaev kelesi jyly barlyq avtomobil ótkizý beketin sapaly rekonstrýktsiialaýdy aiaqtaýdy tapsyrdy. Sondai-aq ol respýblikalyq jáne jergilikti mańyzy bar joldardyń sapasyna jaýapkershilikti Kólik ministrligine júkteýdi usyndy, dep habarlaidy dalanews.kz.
Memleket basshysynyń aitýynsha, buǵan deiin ótkizý beketterin jańǵyrtý jumystary baiaý júrgizilgen.
«Aldymyzda respýblikalyq jáne jergilikti mańyzy bar barlyq avtomobil jolyn sapaly salý mindeti tur. Barlyq jol deimin, eshqaisysy nazardan tys qalmaýy kerek», – dedi prezident.
Toqaevtyń sózinshe, ortalyqtaǵy jáne jergilikti jerlerdegi atqarýshy organdar túrli erejeler men reglamentterdi alǵa tartyp, jol sapasy máselesine qatysty jaýapkershilikti bir-birine ysyryp kelgen. Sonyń saldarynan másele sheshimin tappai, jumys turalap qalǵan.
Osyǵan bailanysty memleket basshysy barlyq avtomobil jolyna jaýapkershilikti Úkimet atynan Kólik ministrligine júkteýdi tapsyrdy. Bul talap respýblikalyq mańyzy bar joldarǵa da, ákimdikterdiń qaramaǵyndaǵy jergilikti joldarǵa da qatysty.
«Qaitadan qaitalaimyn: bizge óte sapaly joldar kerek. Bitýmnyń nemese qiyrshyq tastyń sapasyn syltaý etýge bolmaidy», – dedi Qasym-Jomart Toqaev.
