Қазақстан президенті Қасым-Жомарт Тоқаев келесі жылы барлық автомобиль өткізу бекетін сапалы реконструкциялауды аяқтауды тапсырды. Сондай-ақ ол республикалық және жергілікті маңызы бар жолдардың сапасына жауапкершілікті Көлік министрлігіне жүктеуді ұсынды, деп хабарлайды dalanews.kz.
Мемлекет басшысының айтуынша, бұған дейін өткізу бекеттерін жаңғырту жұмыстары баяу жүргізілген.
«Алдымызда республикалық және жергілікті маңызы бар барлық автомобиль жолын сапалы салу міндеті тұр. Барлық жол деймін, ешқайсысы назардан тыс қалмауы керек», – деді президент.
Тоқаевтың сөзінше, орталықтағы және жергілікті жерлердегі атқарушы органдар түрлі ережелер мен регламенттерді алға тартып, жол сапасы мәселесіне қатысты жауапкершілікті бір-біріне ысырып келген. Соның салдарынан мәселе шешімін таппай, жұмыс тұралап қалған.
Осыған байланысты мемлекет басшысы барлық автомобиль жолына жауапкершілікті Үкімет атынан Көлік министрлігіне жүктеуді тапсырды. Бұл талап республикалық маңызы бар жолдарға да, әкімдіктердің қарамағындағы жергілікті жолдарға да қатысты.
«Қайтадан қайталаймын: бізге өте сапалы жолдар керек. Битумның немесе қиыршық тастың сапасын сылтау етуге болмайды», – деді Қасым-Жомарт Тоқаев.
