Premer-ministr Oljas Bektenov Úkimet otyrysynda jumys oryndaryndaǵy eńbek qaýipsizdigin kúsheitýge bailanysty jaýapty organdar men jumys berýshilerge birqatar naqty tapsyrma júktedi,- dep habarlaidy Dalanews.kz
Otyrysta óndiriste qaýipsiz eńbek jaǵdailaryn qamtamasyz etý jáne eńbek salasyn tolyq tsifrlandyrý máseleleri qaraldy. Úkimet basshysy Memleket basshysynyń tapsyrmasyna sáikes, jumysshy mamandyqtarynyń bedelin arttyrý jáne eńbek qaýipsizdigin qamtamasyz etý — basty mindetterdiń biri ekenin atap ótti.
«Adam ómiri men densaýlyǵy – eń basty qundylyq. Sondyqtan eńbekti qorǵaý júiesi jumys ornynda qaýipsizdikti qamtamasyz etýdiń zamanaýi tásilderine negizdelýi kerek. Jazataiym oqiǵalardy azaitý úshin jumys berýshiler eńbek qaýipsizdigin, avtomattandyrý men tsifrlandyrýdy qamtamasyz etýge mindetti», - dedi Premer-ministr.
Oljas Bektenov:
-
1 qarashaǵa deiin óndiristegi jaraqat alý jaǵdailaryn tirkeitin aqparattyq júielerdi biriktirýdi;
-
1 jeltoqsanǵa deiin eńbekti qorǵaý salasyndaǵy birtutas tsifrlyq ekojúie qurýdy tapsyrdy.
Tsifrlyq damý, innovatsiialar jáne aeroǵarysh ónerkásibi ministrligi bul baǵytta memlekettik organdarmen birlesip jumys isteýi tiis.
Sondai-aq Premer-ministr jumys berýshilerge kelesi mindetterdi júktedi:
-
Jumysshylardy jazataiym oqiǵalardan mindetti saqtandyrý sharttaryn jasaý;
-
Jaraqattanýǵa múldem tózbeýshilik qaǵidatyn engizý;
-
Halyqaralyq standarttarǵa sai kásibi táýekelderdi baǵalaý men basqarý júiesin engizý.
Sonymen qatar, Eńbek jáne halyqty áleýmettik qorǵaý ministrligine jaraqat alý faktilerin jasyrýǵa jol bermeitin zańnamalyq túzetýlerdi 1 qarashaǵa deiin daiyndaý tapsyryldy.
Ónerkásip jáne qurylys ministrligine jyl sońyna deiin óndiris pen qurylys salalarynda arnaiy qaýipsizdik jabdyqtaryn ornatý mindettelse, Tótenshe jaǵdailar ministrligine kásiporyndardy ónerkásiptik qaýipsizdik normalaryna sáikestigi turǵysynan tekserý jumystaryn júrgizý tapsyryldy.
