Premer-ministr Oljas Bektenov «Samuryq-Energo» basshylyǵyna Almatydaǵy JEO-3-ti jańǵyrtý jumystaryn biylǵy jyldyń sońyna deiin aiaqtaýdy tapsyrdy, dep habarlaidy dalanews.kz.
Úkimet otyrysynda Oljas Bektenov Memleket basshysynyń eldi odan ári indýstriialandyrý jáne tsifrlandyrý jónindegi tapsyrmalaryn oryndaý úshin jańa energiia óndirýshi qýattardy ýaqytyly iske qosý mańyzdy ekenin aitty.
Osyǵan bailanysty Energetika ministrligi men «Samuryq-Qazyna» qoryna energetika salasyndaǵy negizgi jobalardy belgilengen merzimde júzege asyrý tapsyryldy.
Premer-ministrdiń aitýynsha, kómir himiiasy salasyndaǵy áleýetti eskere otyryp, kómirdi tereń óńdeý jobalaryna jeke investitsiia tartý jumystaryn jandandyryp, áleýetti investorlardy qoldaý sharalaryn keńeitý qajet.
«Elimizdiń ekonomikasyn damytý energetikalyq qýattardy arttyrýdy talap etedi. Bul ári qarai indýstriialandyrýdy, tsifrlandyrýdy jáne infraqurylymnyń ósip kele jatqan qajettilikterin qamtamasyz etý úshin mańyzdy», – dedi Oljas Bektenov.
Sondai-aq Úkimet basshysy Energetika ministrligi men «Samuryq-Qazyna» qory basshylyǵynyń Almaty elektr stantsiialary men Túrkistan oblysyndaǵy bý-gaz qondyrǵysyn ýaqytynda paidalanýǵa berý boiynsha jeke jaýapkershiligi bar ekenin eske saldy.
Premer-ministr «Samuryq-Energo» basqarma tóraǵasy Qairat Maqsutovqa arnaiy toqtalyp, ótken aptada Energetika ministri Almatydaǵy JEO-2 jáne JEO-3 nysandaryn aralap shyqqanyn aitty.
«JEO-3-tegi jaǵdai qanaǵattanarlyqsyz. Jumys qarqyny óte tómen. Eger jyl sońyna deiin aiaqtamasańyzdar, jeke jaýapkershiligińiz týraly másele qaralady. Bul jumysty kúndelikti baqylaýǵa alyńyz», – dedi Oljas Bektenov.
Sonymen qatar Premer-ministr munai men gaz óndirýdiń josparly kórsetkishterine qol jetkizý úshin Energetika ministrligine barlyq jer qoinaýyn paidalanýshylarmen kelissóz júrgizip, naqty is-qimyl josparyn ázirleýdi tapsyrdy.
