Atyraý oblysy Politsiia departamenti "atyraýlyq hakerge" qatysty málimdeme jasady, dep habarlaidy Dalanews.kz.
Vedomstvo málimetine súiensek, jelide taralyp jatqan "haker" joǵalǵan adamdardyń ornalasqan jerin, qarajat qozǵalysyn óz betinshe anyqtaǵany, SIM kartalardy taldaǵany týraly aqparat shyndyqqa sáikes kelmeidi.
"Bul málimettiń barlyǵy áleýmettik jelilerde qandai da bir jariialanymdar shyqqanǵa deiin ishki ister organdarynyń bólimsheleri tarapynan zańdy jedel izdestirý jáne tergeý sharalary aiasynda anyqtalyp, keiin resmi baǵdarlaý retinde rásimdelgen. Ol jańa derekter almaǵan jáne ózdiginen tehnikalyq taldaý júrgizbegen. Ol taratqan málimet oǵan deiin jasaqtalǵan resmi baǵdarlaýda kórsetilgen aqparatpen tolyq sáikes keledi. Politsiia usynǵan barlyq derek zańnama talaptaryn qatań saqtai otyryp, beiindi tehnikalyq mamandardyń qatysýymen, bailanys operatorlarymen jáne ózge de ýákiletti uiymdarmen ózara is-qimyl arqyly alynǵan. Politsiia tarapynan qysym kórsetý boldy nemese qorqytty degen aqparat ta shyndyqqa janaspaidy", - dep jazylǵan habarlamada.
Politsiia aqparatyna súiensek, oǵan qatysty buǵan deiin alaiaqtyq boiynsha tórt qylmystyq is tirkelgen.
"Qazir osy ister boiynsha tergeý jalǵasyp jatyr jáne oǵan zańda belgilengen tártippen izdeý jariialanǵan", - dep jazylǵan habarlamada.
Aita keteiik, buǵan deiin áleýmettik jelilerde Atyraý oblysynda joǵalǵan otbasyǵa qatysty túrli málimet tarap, qoǵam nazaryn aýdardy. Ásirese, jeli qoldanýshylary Hacker Atyrau paraqshasynda jariialanǵan aqparatty qyzý talqylady.
Paraqsha avtory ashyq baza arqyly joǵalǵandardyń SIM kartalaryn baqylaǵanyn, bank kartasymen jasalǵan tólemderdi anyqtaǵanyn aitty. Ol osy otbasy joǵalǵannan keiin biriniń SIM kartasy mezgil-mezgil qoldanylyp otyrǵanyn da málimdedi. Sondai-aq, otbasy músheleriniń biriniń bank kartasynan qarasha jáne jeltoqsanda zeinetaqy tólemderi alynǵany týraly aqparat taraǵan bolatyn.
Aqparatty taratqan adamnyń ózi memlekettik júielerdi buzbaǵanyn, tek "ashyq derekterdi, SIM kartalardy jáne bailanys operatorlarynan alynǵan málimetterdi" paidalanǵanyn aitty.
