47 jastaǵy Ǵalymjan Sádýaqasov byltyr zeinetke shyqty. Sońǵy jumys orny - Ulttyq qaýipsizdik komitetiniń Shekara akademiiasy. Basylym málimetinshe, Shekara akademiiasynyń burynǵy oqytýshysy 2022 jyly Qańtar oqiǵasy kezinde Kóktóbede shekarashylar men ishki ister ministrligi bólimsheleri arasynda atys bolǵanyn aitqan.
Sádýaqasovtyń sózinshe, 6 qańtarda akademiiaǵa ofitserler men kýrsanttardy telemunara ornalasqan qalanyń ońtústik-shyǵys bóligindegi Kóktóbe taýyna jiberý týraly buiryq túsken. Kýrsanttarmen birge podpolkovnik te sol jerge barǵan. Topta odan bólek taǵy 13 adam bolǵan.
"Azattyq radiosy" málimetinshe, Ulttyq qaýipsizdik komiteti qandy oqiǵalardan keiin "2022 jyly qańtardyń alǵashy kúnderi "qylmyskerler teleradiohabar taratatyn Kóktóbe munarasyn basyp alyp, sol jerden habar taratyp, talaptaryn aitpaq boldy, biraq shekarashylar shabýyldy toitardy" dep málimdedi. Alaida Ǵalymjan Sádýaqasovtyń bergen aiǵaǵy kúsh qurylymdary múlde jumyla áreket etpegenin kórsetedi eken.
"...General blokpost basshysy etip, ornyna meni qoidy. Men topty ekige bólip, Kóktóbege aparatyn qos joldy qorǵai bastadyq. Biz kimmen soǵysyp jatqanymyzdy da bilmedik. Óz tobymdaǵy kólik júrgizýshisine "olar kóldeneń turǵan bette gazdy bas ta, qaǵyp ót" dedim. Iaǵni pýlemet bolmaǵandyqtan, olardy kólikpen basyp-janshýǵa týra keldi. Keshki saǵat 9-ǵa taman bir kólik bar jyldamdyǵymen kelip kilt toqtady. Men aspanǵa oq attym. Sol kezde toptaǵy jigitter de oq jaýdyra bastady. Biz quddy bir sol kólikti atqylap jatqandai boldyq. Kólik keri qarai qatty jyldamdyqpen quiǵyta jóneldi. Keiin olar barlaýǵa kelgeni anyqtaldy. Biz oq ata bastaǵanǵa telemunarany basyp aldy dep oilap qalsa kerek. Men jigitterdi jinap, "endi atpańdar" dep qarýlaryn tastaýdy buiyrdym. Sálden keiin Kóktóbege bes kólikten, arasynda jeńil kólikter men eki Hummer bar lek keldi", - deidi Sádýaqasov.
Ol eskertý bolsyn dep oq atqan, keiin bári bastalyp ketken. Al basylym derekterine súiensek, shekarashylar Kóktóbege lańkester emes, politsiianyń arnaiy jasaǵy kelgenin bilmegen. Olarǵa eshkim eskertpegen. Shekarashylardyń áskeri kóliginiń tas-talqany shyqqan.
Sádýaqasov eseńgirep, tez áreket ete almaǵanyn da moiyndaidy. Qolastyndaǵylar da abdyrap qalǵan. Ózimen birge bolǵan 13 shekarashynyń toǵyzy urys alańynan qashyp ketken.
...Podpolkovnik atys birshama ýaqyttan keiin saiabyrsyǵanyn aitady. Shekarashylar bireýdiń aiqaiyn estidi. Bul kómek surap jatqan qarsy taraptyń adamy bolatyn.
"Ne isteimiz dep ózara aqyldastyq. Joldasymnyń bireýi "bul tuzaqqa túsirýdiń amaly shyǵar, onyń kózin qurtaiyq" dedi. Men: "Joq, kózin qurtpaiyq, odan da qolǵa túsireiik, erteńgi kúni, mine, jaýap alatyn tutqyn bar dep esep bersek te jaqsy emes pe?" deimin.
Jerde jatqan jaralanǵan adam kýáligin kórsetip, "Men de sendermen birgemin!" dedi. Esimge "baryp kórshi" dedim. Ózime ishtei "Qazir óziń baryp kór dese, bara almaisyń ǵoi" dep qoiamyn. Esim eshteńe demesten, álgige jaqyndap baryp, "Bizdiki eken, bizdiki!" dep aiqailady. IIM qyzmetkeri, maior. Oǵymyz onyń tórt jerine tigen eken.
Beti qaǵazdai bozaryp ketipti, ólim aýzynda jatyr. "Ái, ólme!" dep ony silkilep jatqanymyz esimde. Ol "Ana! Anam! Sońǵy ret anammen sóileskim keledi" dedi. Telefonyn alyp, anasynyń nómirin izdei bastadyq. ...Sol kúii tildese almady. Bulai bolady dep oilamadyq. Onyń jarasyn tańý kerek edi, al bizde tańatyn eshteńe bolǵan joq. Denesiniń oq tigen tustaryn qolymyzben bitep álekpiz. Abyroi bolǵanda, bailanys iske qosyldy. Bolǵan jaitty baiandap, jedel járdem shaqyrdyq. Olar kelip, jaralanǵan azamatty alyp ketti. Bul meniń ómirimdegi eń uzaq jáne azapqa toly tún edi. Men kóz ilmei, "Biz ne búldirip qoidyq?!" dep oilanýmen boldym. Álgi jigit kóz jumǵan shyǵar dep oilaǵan edim. Biraq aman qalypty", - deidi ol.
Podpolkovnik Sádýaqasov politsei naqty qalai jaralanǵanyn bilmeitinin jetkizdi. Sonymen qatar, urys kezinde jaralanǵan jigitti kórgenge deiin "lańkestermen soǵysyp jatyrmyz" dep oilaǵanyn aitady. Politsiiaǵa "at" degen buiryqty kim bergenin áli kúnge túsinbeidi.
"Biz telemunaraǵa kúndiz shyqtyq. Halyqtyń birazy biz bara jatqanymyzdy kórdi. Teleortalyq direktory da qorǵaýǵa kelgenimizdi biletin. Bizdiń sonda ekenimizden bári habardar edi. Sonda IIM qyzmetkerlerine "shabýyl jasa" dep buiryq bergen kim? Bul álde arandatýshylyq pa? Ne ekenin túsinsem buiyrmasyn?" - deidi ol.
https://dalanews.kz/del-qazir/97580-basy-dauga-qalgan-satybaldy-qazaqfi
