Petropavlda aǵash otyrǵyzýǵa 600 mln teńgege tikelei kelisimshart jasalǵan, dep habarlaidy dalanews.kz.
Bul týraly "Goszakup turaly" telegram-arnasy málimdedi. Derekkózdiń jazýynsha, qala ákimdigine qarasty TKSh bólimi kelisimshartty tótenshe jaǵdai saldaryn joiý negizinde rásimdegen. Alaida avtorlar mundai tásildiń qanshalyqty zańdy ári negizdi ekenine kúmán keltirip otyr.
Sonymen qatar bul jalǵyz kelisimshart emes ekeni aityldy. Jýyrda Piostroe kóli aýmaǵyn abattandyrýǵa bailanysty taǵy 2,4 mlrd teńgeniń satyp alýy jariialanǵan. Budan bólek, eki pannony jóndeýge 112 mln teńge bólingen.
Goszakup avtorlarynyń aitýynsha, atalǵan jobalardyń barlyǵy tikelei kelisimshart arqyly júzege asyrylyp jatyr. Olardyń pikirinshe, mundai tásildi qoldanýǵa jetkilikti negiz kórsetilmegen.
“Ákimdik ókilderi zań normalaryn alǵa tartyp, jumystardy qysqa merzimde oryndaý qajettigin aitýy múmkin. Biraq birneshe kún aiyrmashylyq úshin konkýrs ótkizýden bas tartý qisynsyz”, – delingen jazbada.
Arna avtorlary muny memlekettik satyp alý júiesindegi júieli másele ekenin jetkizdi. Olardyń sózinshe, tapsyrys berýshilerge tym kóp erkindik berilgendikten, satyp alýlar naqty ári ashyq algoritmmen emes, óz qalaýynsha júrgiziledi.
Sondai-aq 600 mln teńgelik kelisimshart Meshan ormanyndaǵy aǵash otyrǵyzý jumystaryna bailanysty bolýy múmkin ekeni aitylǵan. Alaida tikelei kelisimsharttardyń jabyq formatyna bailanysty naqty aqparatty anyqtaý múmkin bolmai otyrǵany atalyp ótken.
