Jaqynda Jambyl oblysyndaǵy perzenthanada kópshiliktiń jaǵasyn ustatqan qaiǵyly jaǵdai oryn alǵan edi. Osy tusta perinataldyq ortalyq óz-ózine qol jumsaǵan 33 jastaǵy áieldiń qazasyna bailanysty túsinikteme berdi, dep habarlaidy Dalanews.kz.
Aqparattarǵa súiensek, perzenthana oqiǵany bir apta boiy jasyryp kelgen kórinedi. Al politsei bul faktige bailanysty qylmystyq is qozǵap, qajetti saraptamalar taǵaiyndalatynyn jetkizdi.
"Atalǵan derek boiynsha Politsiia departamentimen qylmystyq is qozǵaldy. Qajetti saraptamalar kesheni taǵaiyndaldy, ony júrgizý Jambyl oblysy boiynsha sot-saraptamalary institýtynyń sarapshylaryna tapsyryldy", – dep málimdedi Jambyl oblystyq PD baspasóz qyzmeti.
Osy tusta perinataldyq ortalyqtyń baspasóz qyzmetiniń basshysy Tolqyn Ómirbaeva marqumnyń qazasyna bailanysty shama-sharqynsha pikir bildirdi.
"Jambyl oblystyq perinataldyq ortalyǵy 10 sáýirde aýrýhanada bolǵan oqys oqiǵa boiynsha kelesini habarlaidy. Júkti áiel jalǵan tolǵaq diagnozymen baqylaýda bolyp, tiisti emin qabyldap júrgen. Áieldiń júkti kezinde eshqandai psihologiialyq aýytqýy baiqalmaǵan. Oqiǵa ornyna jedel-tergeý toby keldi. Atalǵan faktige bailanysty quqyq qorǵaý organdary 105-baptyń 1-bóligi (Ózin-ózi óltirýge itermeleý) boiynsha sotqa deiingi tergeý amaldaryn bastady. Sot-meditsinalyq saraptamasy júrgizilip jatyr. Sondyqtan basqa túsinikteme bere almaimyz", – dep jaýap berdi ortalyqtyń baspasóz qyzmeti Vremia basylymy joldaǵan saýalǵa.
Is "ózin-ózi óltirýge itermeleý" baby boiynsha qozǵalǵandyqtan, muny naqty kim jasaǵany jáne marqumnyń meditsina qyzmetkerlerimen qandai da bir kikiljińi bolǵan-bolmaǵany da suraldy.
"Emdeý mekemesinde bolǵan kezinde meditsina qyzmetkerlerimen janjal bolǵan joq", - dep jaýap berdi Ómirbaeva.
"Vremia" derekkóziniń málimetinshe, marqum buǵan deiin kúieýimen jáne úsh qyzymen turyp kelgen. Onyń aýrýhanaǵa Sarysý aýdanynan túskeni anyqtaldy. Áiel bul kezde ulyna aiaǵy aýyr bolǵan. Taiaýda otbasy genderlik kesh ótkizip, balanyń jynysyn jariialaǵan.
Aýdandyq aýrýhananyń habarlaýynsha, marqum ishi aýyrǵanyna shaǵymdanyp, jergilikti ginekologqa habarlasqan. Keiin ol aýrýhanaǵa jatqyzýdy talap etkenin aitty. Perinataldyq ortalyqta onymen úsh áiel bir bólmede jatqan. Áielderdiń sózinshe, sol kúni marqum kúieýimen qarjy máselesine bailanysty janjaldasyp qalǵan.
Eske salaiyq, 9 sáýirde Taraz qalasynyń Politsiia basqarmasyna Jambyl oblystyq perinataldyq ortalyqtan perzenthana palatasynyń jýyný bólmesinde 33 jastaǵy júkti áieldiń asylyp turǵany týraly habarlama túskenin habarlaǵan bolatyn.
