جاقىندا جامبىل وبلىسىنداعى پەرزەنتحانادا كوپشىلىكتىڭ جاعاسىن ۇستاتقان قايعىلى جاعداي ورىن العان ەدى. وسى تۇستا پەريناتالدىق ورتالىق وز-وزىنە قول جۇمساعان 33 جاستاعى ايەلدىڭ قازاسىنا بايلانىستى تۇسىنىكتەمە بەردى، دەپ حابارلايدى Dalanews.kz.

اقپاراتتارعا سۇيەنسەك، پەرزەنتحانا وقيعانى ءبىر اپتا بويى جاسىرىپ كەلگەن كورىنەدى. ال پوليسەي بۇل فاكتىگە بايلانىستى قىلمىستىق ءىس قوزعاپ، قاجەتتى ساراپتامالار تاعايىندالاتىنىن جەتكىزدى.

"اتالعان دەرەك بويىنشا پوليسيا دەپارتامەنتىمەن قىلمىستىق ءىس قوزعالدى. قاجەتتى ساراپتامالار كەشەنى تاعايىندالدى، ونى جۇرگىزۋ جامبىل وبلىسى بويىنشا سوت-ساراپتامالارى ينستيتۋتىنىڭ ساراپشىلارىنا تاپسىرىلدى"، – دەپ مالىمدەدى جامبىل وبلىستىق پد باسپا ءسوز قىزمەتى.

وسى تۇستا پەريناتالدىق ورتالىقتىڭ باسپا ءسوز قىزمەتىنىڭ باسشىسى تولقىن ومىربايەۆا مارقۇمنىڭ قازاسىنا بايلانىستى شاما-شارقىنشا پىكىر ءبىلدىردى. 

"جامبىل وبلىستىق پەريناتالدىق ورتالىعى 10 ساۋىردە اۋرۋحانادا بولعان وقىس وقيعا بويىنشا كەلەسىنى حابارلايدى. جۇكتى ايەل جالعان تولعاق دياگنوزىمەن باقىلاۋدا بولىپ، ءتيىستى ەمىن قابىلداپ جۇرگەن. ايەلدىڭ جۇكتى كەزىندە ەشقانداي پسيحولوگيالىق اۋىتقۋى بايقالماعان. وقيعا ورنىنا جەدەل-تەرگەۋ توبى كەلدى. اتالعان فاكتىگە بايلانىستى قۇقىق قورعاۋ ورگاندارى 105-باپتىڭ 1-بولىگى (ءوزىن-وزى ولتىرۋگە يتەرمەلەۋ) بويىنشا سوتقا دەيىنگى تەرگەۋ امالدارىن باستادى. سوت-مەديسينالىق ساراپتاماسى جۇرگىزىلىپ جاتىر. سوندىقتان باسقا تۇسىنىكتەمە بەرە المايمىز"، – دەپ جاۋاپ بەردى ورتالىقتىڭ باسپا ءسوز قىزمەتى ۆرەميا باسىلىمى جولداعان ساۋالعا.

ءىس "ءوزىن-وزى ولتىرۋگە يتەرمەلەۋ" بابى بويىنشا قوزعالعاندىقتان، مۇنى ناقتى كىم جاساعانى جانە مارقۇمنىڭ مەديسينا قىزمەتكەرلەرىمەن قانداي دا ءبىر كيكىلجىڭى بولعان-بولماعانى دا سۇرالدى.

"ەمدەۋ مەكەمەسىندە بولعان كەزىندە مەديسينا قىزمەتكەرلەرىمەن جانجال بولعان جوق"، - دەپ جاۋاپ بەردى ومىربايەۆا.

"ۆرەميا" دەرەككوزىنىڭ مالىمەتىنشە، مارقۇم بۇعان دەيىن كۇيەۋىمەن جانە ءۇش قىزىمەن تۇرىپ كەلگەن. ونىڭ اۋرۋحاناعا سارىسۋ اۋدانىنان تۇسكەنى انىقتالدى. ايەل بۇل كەزدە ۇلىنا اياعى اۋىر بولعان. تاياۋدا وتباسى گەندەرلىك كەش وتكىزىپ، بالانىڭ جىنىسىن جاريالاعان.

اۋداندىق اۋرۋحانانىڭ حابارلاۋىنشا، مارقۇم ءىشى اۋىرعانىنا شاعىمدانىپ، جەرگىلىكتى گينەكولوگقا حابارلاسقان. كەيىن ول اۋرۋحاناعا جاتقىزۋدى تالاپ ەتكەنىن ايتتى. پەريناتالدىق ورتالىقتا ونىمەن ءۇش ايەل ءبىر بولمەدە جاتقان. ايەلدەردىڭ سوزىنشە، سول كۇنى مارقۇم كۇيەۋىمەن قارجى ماسەلەسىنە بايلانىستى جانجالداسىپ قالعان.

ەسكە سالايىق، 9 ساۋىردە تاراز قالاسىنىڭ پوليسيا باسقارماسىنا جامبىل وبلىستىق پەريناتالدىق ورتالىقتان پەرزەنتحانا پالاتاسىنىڭ جۋىنۋ بولمەسىندە 33 جاستاعى جۇكتى ايەلدىڭ اسىلىپ تۇرعانى تۋرالى حابارلاما تۇسكەنىن حابارلاعان بولاتىن.