Alaiaqtyq jasady jáne qylmystyq jolmen tabylǵan qarajatty zańdastyrdy degen kúdikke ilingen Perizat Qairattyń tergeý izoliatorynda soqqyǵa jyǵylǵany rastalmady, dep habarlaidy Dalanews.kz.
9 shildede aiyptalýshy prokýratýraǵa aryz túsirip, onda izoliator qyzmetkeri kameranyń esigin kúshpen jaýyp, ony esik arasyna qysyp ketkenin málimdegen. Astana qalalyq Politsiia departamentiniń habarlaýynsha, bul shaǵym boiynsha materialdar olarǵa joldanyp, tergeý aiasynda beinebaqylaý kamerasyndaǵy jazba zerttelgen.
"Qairat P.-nyń kamera esigi jabylǵan kezde mekeme qyzmetkerleri tarapynan dene jaraqatyn aldym degen ýáji rastalmady. Bul týraly onyń aryzynda kórsetilgen ýaqytta jazylǵan beinebaqylaý jazbasy dálel bola alady", – delingen vedomstvo taratqan málimdemede.
Aita keteiik, keshe Astanada Perizat Qairat pen anasyna qatysty sot bastaldy. Kúdikti tergeý izoliatorynda ózine kúsh qoldanylǵanyn málimdegen edi. Bul týraly Tengrinews.kz jazdy.
"Moraldyq turǵydan qatty sharshadym. Endi ǵana tergeý izoliatorynyń qyzmetkerleri tarapynan uryp-soǵý deregi týraly ashyq aita alamyn. Astana qalalyq prokýratýrasy bul derek boiynsha qylmystyq is qozǵady. Qazir jaǵdaiym birshama jaqsardy", – dedi Perizat Qairat.
Jýrnalister onyń quqyq qorǵaý uiymdarynan kómek suraǵan-suramaǵanyn naqtylady.
"Qandai ótinish túsirsem de, búginge deiin maǵan qoǵamdyq qorǵaýshy taǵaiyndalǵan joq. Anamdy da alǵash ret búgin ǵana kórip turmyn. Oǵan kúdikti mártebesi tek 18 naýryzda berildi. Meniń barlyq zańdy quqyǵym aiaq-asty etildi", – dep kózine jas aldy aiyptalýshy.
Sondai-aq Perizat Qairat ashyq sot protsesine qarsy emestigin aitty. Biraq jýrnalisterden anasyn kameraǵa túsirmeýdi surady.
Keiinirek Perizat Qairatqa qatysty sot otyrysy qalai ótetini belgili boldy.
"Perizat Qairattyń aldyn ala tyńdaýdaǵy ótinishi qaraldy (...) Sot sot protsesin jabyq túrde ótkizý týraly ótinishti ishinara qanaǵattandyrý týraly qaýly shyǵardy. Sot otyrysy 2025 jyly 14 shildede saǵat 10:00-ge belgilendi", - dedi sýdia.
