Perızat Qaırattyń múlki áli tárkilengen joq. Bul týraly Astana qalasy prokýrorynyń kómekshisi Indıra Jumaǵalıqyzy aıtty, dep habarlaıdy Dalanews.kz.
Onyń aıtýynsha, Perızat Qaırat pen onyń anasynyń múlki úkim zańdy kúshine engennen keıin ǵana tárkilenedi.
"Tárkileý máselesi keıin qaralady. Tıisti sharalardy memleket te, jeke sot oryndaýshylary da qabyldaıdy", – dep túsindirdi Jumaǵalıqyzy.
Sonymen qatar, prokýror kómekshisi múlikke qamaý qoıylǵanyn, alaıda tárkileý rásimi keıin júzege asatynyn naqtylady.
Búgin Astanadaǵy sotta qoǵam belsendisi Perızat Qaırat pen onyń anasynyń apelásıalyq shaǵymy qaralýda. Sotta Perızat Qaırattyń advokaty ony tolyq aqtaýdy surady.
Eske sala keteıik, 11 tamyzda advokat Arman Davletárov Perızat Qaırat pen onyń anasy Ǵaını Alashbaevanyń múddesin qorǵap, apelásıalyq shaǵym túsirgen bolatyn. Ol úkimdi joıyp, qorǵaýyndaǵy adamdardy qylmys quramynyń joqtyǵyna baılanysty aqtaýdy surady.
Buǵan deıin Perızat Qaırat ortasha qaýipsizdik mekemesinde 10 jylǵa bas bostandyǵynan aıyrylǵan edi. Al Ǵaını Alashbaeva 7 jylǵa sottalǵan.
