پەريزات قايراتتىڭ مۇلكى ءالى تاركىلەنگەن جوق. بۇل تۋرالى استانا قالاسى پروكۋرورىنىڭ كومەكشىسى ينديرا جۇماعالي قىزى ايتتى، دەپ حابارلايدى Dalanews.kz.
ونىڭ ايتۋىنشا، پەريزات قايرات پەن ونىڭ اناسىنىڭ مۇلكى ۇكىم زاڭدى كۇشىنە ەنگەننەن كەيىن عانا تاركىلەنەدى.
"تاركىلەۋ ماسەلەسى كەيىن قارالادى. ءتيىستى شارالاردى مەملەكەت تە، جەكە سوت ورىنداۋشىلارى دا قابىلدايدى"، – دەپ ءتۇسىندىردى جۇماعالي قىزى.
سونىمەن قاتار، پروكۋرور كومەكشىسى مۇلىككە قاماۋ قويىلعانىن، الايدا تاركىلەۋ ءراسىمى كەيىن جۇزەگە اساتىنىن ناقتىلادى.
بۇگىن استاناداعى سوتتا قوعام بەلسەندىسى پەريزات قايرات پەن ونىڭ اناسىنىڭ اپەللياسيالىق شاعىمى قارالۋدا. سوتتا پەريزات قايراتتىڭ ادۆوكاتى ونى تولىق اقتاۋدى سۇرادى.
ەسكە سالا كەتەيىك، 11 تامىزدا ادۆوكات ارمان داۆلەتياروۆ پەريزات قايرات پەن ونىڭ اناسى عايني الاشبايەۆانىڭ مۇددەسىن قورعاپ، اپەللياسيالىق شاعىم تۇسىرگەن بولاتىن. ول ۇكىمدى جويىپ، قورعاۋىنداعى ادامداردى قىلمىس قۇرامىنىڭ جوقتىعىنا بايلانىستى اقتاۋدى سۇرادى.
بۇعان دەيىن پەريزات قايرات ورتاشا قاۋىپسىزدىك مەكەمەسىندە 10 جىلعا باس بوستاندىعىنان ايىرىلعان ەدى. ال عايني الاشبايەۆا 7 جىلعا سوتتالعان.
