Áleýmettik jelilerde jýyrda ustalǵan Perizat Qairattyń "suhbaty" jariialandy. Onda erikti retinde tanylǵan Perizat Qairat Qarjylyq monitoring agenttigi taqqan barlyq aiypty joqqa shyǵarǵan eken. Alaida stopfake.kz munyń alaiaqtar adamdardy aldaý úshin qoldanatyn feik suhbat ekenin jazdy, - dep habarlaidy Dalanews.kz.
Basylym málimetinshe, jelide taraǵan jazbanyń taqyryby da qyzyq jáne onda Tengrinews.org degen saitqa silteme jasalǵan. Degenmen saittyń domeni ulttyq .kz emes, halyqaralyq .org ekenin baiqaýǵa bolady.
Tengrinews jańalyqtar portaly .kz domenin paidalanady.
"Alaiaqtar neǵurlym senimdi bolýy úshin qazaqstandyq internet basylymnyń basty betin tolyǵymen kóshirip alǵan", - dep jazylǵan derekte.
Suhbat mátininde alaiaqtar "passivti kiris" usyna otyryp, tanymal qazaqstandyq banktiń baǵdarlamasyn jarnamalaidy. Shyn máninde, bul baǵdarlamanyń qarjy institýtyna eshqandai qatysy joq, ol - qylmystyq shemanyń bir bóligi.
"Kiberqylmyskerler jalǵan saitta tez arada dividend tólenetinin aityp, ótinim toltyrýdy usynady. Olardyń qýlyǵyna túsip qalmańyz: kúmándi saýalnamalardy toltyrmańyz jáne ońai paida tabýdy usynǵan beitanys adamdarǵa senbeńiz. Belsendige taǵylǵan aiyptar joqqa shyǵarylǵan joq, al aqparattyń ózi - alaiaqtyq shemanyń bir bóligi. Alaiaqtardyń kózdegen maqsaty - jeke derekterińiz ben aqshańyzdy iemdený úshin sizdi jalǵan saitqa tartý", - dep jazylǵan derekte.
Aita keteiik, Perizat Qairat - Biz Birgemiz Qazaqstan qaiyrymdylyq qorynyń tóraiymy, Qazaqstandaǵy belsendi eriktiler qozǵalysynyń jetekshisi retinde tanymal. Ol sý tasqynynan zardap shekkenderge kómek kórsetý, Gaza sektoryndaǵy gýmanitarlyq missiialar jáne basqa da qaiyrymdylyq sharalarymen ainalysyp, qoǵamda bedelge ie boldy.
14 qarashada Qarjylyq monitoring agenttigi Perizat Qairat 1,5 milliardty jymqyrdy degen kúdikke ilingenin habarlady.
Sonymen qatar ol 2023 jylǵy qarashada Palestina turǵyndaryna gýmanitarlyq kómek kórsetý úshin qarajat jinap, onyń 200 millionyn qaltasyna basqan degen kúdikke ilindi. 2023 jylǵy jeltoqsanda osy aqsha esebinen Perizat Q. Sensata Plaza elitalyq kesheninen 49 million teńgege úsh bólmeli páter jáne 30 million teńgege Mercedes-Benz EQE 500 4 Matic jańa avtokóligin satyp alǵan.
16 qarashada Astana qalasynyń tergeý soty Perizat Qairat 2 aiǵa qamaýǵa alynǵanyn habarlady.
