الەۋمەتتىك جەلىلەردە جۋىردا ۇستالعان پەريزات قايراتتىڭ "سۇحباتى" جاريالاندى. وندا ەرىكتى رەتىندە تانىلعان پەريزات قايرات قارجىلىق مونيتورينگ اگەنتتىگى تاققان بارلىق ايىپتى جوققا شىعارعان ەكەن. الايدا stopfake.kz مۇنىڭ الاياقتار ادامداردى الداۋ ءۇشىن قولداناتىن فەيك سۇحبات ەكەنىن جازدى، - دەپ حابارلايدى Dalanews.kz.
باسىلىم مالىمەتىنشە، جەلىدە تاراعان جازبانىڭ تاقىرىبى دا قىزىق جانە وندا Tengrinews.org دەگەن سايتقا سىلتەمە جاسالعان. دەگەنمەن سايتتىڭ دومەنى ۇلتتىق .kz ەمەس، حالىقارالىق .org ەكەنىن بايقاۋعا بولادى.
Tengrinews جاڭالىقتار پورتالى .kz دومەنىن پايدالانادى.
"الاياقتار نەعۇرلىم سەنىمدى بولۋى ءۇشىن قازاقستاندىق ينتەرنەت باسىلىمنىڭ باستى بەتىن تولىعىمەن كوشىرىپ العان"، - دەپ جازىلعان دەرەكتە.
سۇحبات ماتىنىندە الاياقتار "ءپاسسيۆتى كىرىس" ۇسىنا وتىرىپ، تانىمال قازاقستاندىق بانكتىڭ باعدارلاماسىن جارنامالايدى. شىن مانىندە، بۇل باعدارلامانىڭ قارجى ينستيتۋتىنا ەشقانداي قاتىسى جوق، ول - قىلمىستىق سحەمانىڭ ءبىر بولىگى.
"كيبەرقىلمىسكەرلەر جالعان سايتتا تەز ارادا ديۆيدەند تولەنەتىنىن ايتىپ، ءوتىنىم تولتىرۋدى ۇسىنادى. ولاردىڭ قۋلىعىنا ءتۇسىپ قالماڭىز: كۇماندى ساۋالنامالاردى تولتىرماڭىز جانە وڭاي پايدا تابۋدى ۇسىنعان بەيتانىس ادامدارعا سەنبەڭىز. بەلسەندىگە تاعىلعان ايىپتار جوققا شىعارىلعان جوق، ال اقپاراتتىڭ ءوزى - الاياقتىق سحەمانىڭ ءبىر بولىگى. الاياقتاردىڭ كوزدەگەن ماقساتى - جەكە دەرەكتەرىڭىز بەن اقشاڭىزدى يەمدەنۋ ءۇشىن ءسىزدى جالعان سايتقا تارتۋ"، - دەپ جازىلعان دەرەكتە.
ايتا كەتەيىك، پەريزات قايرات - Biz Birgemiz Qazaqstan قايىرىمدىلىق قورىنىڭ ءتورايىمى، قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.
14 قاراشادا قارجىلىق مونيتورينگ اگەنتتىگى پەريزات قايرات 1،5 ميللياردتى جىمقىردى دەگەن كۇدىككە ىلىنگەنىن حابارلادى.
سونىمەن قاتار ول 2023 جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ، ونىڭ 200 ميلليونىن قالتاسىنا باسقان دەگەن كۇدىككە ءىلىندى. 2023 جىلعى جەلتوقساندا وسى اقشا ەسەبىنەن پەريزات ق. Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا اۆتوكولىگىن ساتىپ العان.
16 قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى.
