Qazaqstanda keiingi kezde qaiyrymdylyq qorlaryna qatysty daý kóp. Bul baǵytta Qazaqstannyń statistikasy qandai? Ranking.kz sarapshylary taldaý júrgizdi, - dep habarlaidy Dalanews.kz.
Statistika ne deidi?
2024 jyly Qazaqstanda volonterlik qyzmetpen ainalysatyndar sany 62 myń adamǵa jetti, bul 2023 jylmen salystyrǵanda 46,2%-ǵa az. Óńirler arasynda Túrkistan oblysynda eń kóp volonter tirkelgen: 27,3 myń adam. Aldyńǵy qatardaǵy óńirler bestigine Mańǵystaý jáne Qaraǵandy oblystary, Astana jáne Almaty da kirgen. Eriktilerdiń eń az sany Ulytaý (barlyǵy 22 adam), Abai (30 adam) jáne Almaty (86 adam) oblystarynda tirkeldi.
Eriktiler arasynda erler basym boldy: 33,4 myń, áielder sany - 28,6 myń. Volonterlik qyzmetpen aýyldyq jerlerdiń turǵyndary kóbirek ainalysatyny belgili boldy: 35,6 myń adam, qalada 26,4 myń azamat.
Qandai túrleri damyǵan?
- 2024 jyly qazaqstandyqtar arasynda volonterlik qyzmettiń eń kóp taraǵan túri dostaryna, kórshilerine jáne áriptesterine kómek kórsetý boldy, ony 25,1 myń adam jasaǵan, 2023 jylmen salystyrǵanda 49,6%-ǵa az.
- Tanymaldyq boiynsha ekinshi orynda kósheler, saiabaqtar men sý qoimalary siiaqty aýmaqtardy abattandyrý men tazalaýǵa qatysý, sondai-aq, janýarlarǵa, qustarǵa jáne balyqtarǵa kómektesý boldy. Volonterlik qyzmettiń bul túrine 17,6 myń adam tartyldy.
- Volonterlerdiń bir bóligi, iaǵni 3 myń adam mektepterdiń, bilim berý mekemeleriniń, dini jáne basqa da kommertsiialyq emes uiymdardyń, klýbtar men odaqtardyń qoǵamdyq organdarynyń jumysyna qatysty.
Reitingte qai oryndamyz?
2024 jylǵy qaiyrymdylyq indeksi boiynsha elder reitinginde Qazaqstan 142-den 113-orynǵa ie boldy. Indeks úsh negizgi kriterii negizinde qalyptasty: aqshalai qaiyrymdylyq, qaiyrymdylyq bastamalaryna qatysý jáne halyqtyń qaiyrymdylyq pen eriktilikke degen jalpy kózqarasy.
Reitingtiń kóshbasshysy Indoneziia, Keniia jáne Singapýr boldy.
TMD elderi ishinen Resei (35-shi), Ózbekstan (45-shi), Tájikstan (62-shi), Qyrǵyzstan (64-shi), Ázirbaijan (119-shy), Armeniia (124-shi) jáne Moldova (127-shi) jaqsy kórsetkish kórsetken.
Perizat Qairatqa qatysty is
Perizat Qairat - Biz Birgemiz Qazaqstan qaiyrymdylyq qorynyń tóraiymy, Qazaqstandaǵy belsendi eriktiler qozǵalysynyń jetekshisi retinde tanymal. Ol sý tasqynynan zardap shekkenderge kómek kórsetý, Gaza sektoryndaǵy gýmanitarlyq missiialar jáne basqa da qaiyrymdylyq sharalarymen ainalysyp, qoǵamda bedelge ie boldy.
Alaida 2024 jyly 14 qarashada Qarjylyq monitoring agenttigi Perizat Qairat 1,5 milliardty jymqyrdy degen kúdikke ilingenin habarlady.
Sonymen qatar, ol 2023 jylǵy qarashada Palestina turǵyndaryna gýmanitarlyq kómek kórsetý úshin qarajat jinap, onyń 200 millionyn qaltasyna basqan degen kúdikke ilindi. QMA dereginshe, 2023 jylǵy jeltoqsanda osy aqsha esebinen Perizat Qairat Sensata Plaza elitalyq kesheninen 49 million teńgege úsh bólmeli páter jáne 30 million teńgege Mercedes-Benz EQE 500 4 Matic jańa kóligin satyp alǵan.
2024 jyly 16 qarashada Astana qalasynyń tergeý soty Perizat Qairat 2 aiǵa qamaýǵa alynǵanyn habarlady. Jýyrda Perizat Qairatqa qatysty isti tergeý aiaqtaldy.
