قازاقستاندا كەيىنگى كەزدە قايىرىمدىلىق قورلارىنا قاتىستى داۋ كوپ. بۇل باعىتتا قازاقستاننىڭ ستاتيستيكاسى قانداي؟ Ranking.kz ساراپشىلارى تالداۋ جۇرگىزدى، - دەپ حابارلايدى Dalanews.kz.
ستاتيستيكا نە دەيدى؟
2024 جىلى قازاقستاندا ۆولونتەرلىك قىزمەتپەن اينالىساتىندار سانى 62 مىڭ ادامعا جەتتى، بۇل 2023 جىلمەن سالىستىرعاندا 46،2%-عا از. وڭىرلەر اراسىندا تۇركىستان وبلىسىندا ەڭ كوپ ۆولونتەر تىركەلگەن: 27،3 مىڭ ادام. الدىڭعى قاتارداعى وڭىرلەر بەستىگىنە ماڭعىستاۋ جانە قاراعاندى وبلىستارى، استانا جانە الماتى دا كىرگەن. ەرىكتىلەردىڭ ەڭ از سانى ۇلىتاۋ (بارلىعى 22 ادام)، اباي (30 ادام) جانە الماتى (86 ادام) وبلىستارىندا تىركەلدى.
ەرىكتىلەر اراسىندا ەرلەر باسىم بولدى: 33،4 مىڭ، ايەلدەر سانى - 28،6 مىڭ. ۆولونتەرلىك قىزمەتپەن اۋىلدىق جەرلەردىڭ تۇرعىندارى كوبىرەك اينالىساتىنى بەلگىلى بولدى: 35،6 مىڭ ادام، قالادا 26،4 مىڭ ازامات.
قانداي تۇرلەرى دامىعان؟
- 2024 جىلى قازاقستاندىقتار اراسىندا ۆولونتەرلىك قىزمەتتىڭ ەڭ كوپ تاراعان ءتۇرى دوستارىنا، كورشىلەرىنە جانە ارىپتەستەرىنە كومەك كورسەتۋ بولدى، ونى 25،1 مىڭ ادام جاساعان، 2023 جىلمەن سالىستىرعاندا 49،6%-عا از.
- تانىمالدىق بويىنشا ەكىنشى ورىندا كوشەلەر، ساياباقتار مەن سۋ قويمالارى سياقتى اۋماقتاردى اباتتاندىرۋ مەن تازالاۋعا قاتىسۋ، سونداي-اق، جانۋارلارعا، قۇستارعا جانە بالىقتارعا كومەكتەسۋ بولدى. ۆولونتەرلىك قىزمەتتىڭ بۇل تۇرىنە 17،6 مىڭ ادام تارتىلدى.
- ۆولونتەرلەردىڭ ءبىر بولىگى، ياعني 3 مىڭ ادام مەكتەپتەردىڭ، ءبىلىم بەرۋ مەكەمەلەرىنىڭ، ءدىني جانە باسقا دا كوممەرسيالىق ەمەس ۇيىمداردىڭ، كلۋبتار مەن وداقتاردىڭ قوعامدىق ورگاندارىنىڭ جۇمىسىنا قاتىستى.
رەيتينگتە قاي ورىندامىز؟
2024 جىلعى قايىرىمدىلىق يندەكسى بويىنشا ەلدەر رەيتينگىندە قازاقستان 142-دەن 113-ورىنعا يە بولدى. يندەكس ءۇش نەگىزگى كريتەريي نەگىزىندە قالىپتاستى: اقشالاي قايىرىمدىلىق، قايىرىمدىلىق باستامالارىنا قاتىسۋ جانە حالىقتىڭ قايىرىمدىلىق پەن ەرىكتىلىككە دەگەن جالپى كوزقاراسى.
رەيتينگتىڭ كوشباسشىسى يندونەزيا، كەنيا جانە سينگاپۋر بولدى.
تمد ەلدەرى ىشىنەن رەسەي (35ء-شى)، وزبەكستان (45ء-شى)، تاجىكستان (62ء-شى)، قىرعىزستان (64ء-شى)، ءازىربايجان (119-شى)، ارمەنيا (124ء-شى) جانە مولدوۆا (127ء-شى) جاقسى كورسەتكىش كورسەتكەن.
پەريزات قايراتقا قاتىستى ءىس
پەريزات قايرات - Biz Birgemiz Qazaqstan قايىرىمدىلىق قورىنىڭ ءتورايىمى، قازاقستانداعى بەلسەندى ەرىكتىلەر قوزعالىسىنىڭ جەتەكشىسى رەتىندە تانىمال. ول سۋ تاسقىنىنان زارداپ شەككەندەرگە كومەك كورسەتۋ، گازا سەكتورىنداعى گۋمانيتارلىق ميسسيالار جانە باسقا دا قايىرىمدىلىق شارالارىمەن اينالىسىپ، قوعامدا بەدەلگە يە بولدى.
الايدا 2024 جىلى 14 قاراشادا قارجىلىق مونيتورينگ اگەنتتىگى پەريزات قايرات 1،5 ميللياردتى جىمقىردى دەگەن كۇدىككە ىلىنگەنىن حابارلادى.
سونىمەن قاتار، ول 2023 جىلعى قاراشادا پالەستينا تۇرعىندارىنا گۋمانيتارلىق كومەك كورسەتۋ ءۇشىن قاراجات جيناپ، ونىڭ 200 ميلليونىن قالتاسىنا باسقان دەگەن كۇدىككە ءىلىندى. قما دەرەگىنشە، 2023 جىلعى جەلتوقساندا وسى اقشا ەسەبىنەن پەريزات قايرات Sensata Plaza ەليتالىق كەشەنىنەن 49 ميلليون تەڭگەگە ءۇش بولمەلى پاتەر جانە 30 ميلليون تەڭگەگە Mercedes-Benz EQE 500 4 Matic جاڭا كولىگىن ساتىپ العان.
2024 جىلى 16 قاراشادا استانا قالاسىنىڭ تەرگەۋ سوتى پەريزات قايرات 2 ايعا قاماۋعا الىنعانىن حابارلادى. جۋىردا پەريزات قايراتقا قاتىستى ءىستى تەرگەۋ اياقتالدى.
