Astanada qaiyrymdylyqqa qatysty taǵy bir daýly qylmystyq is qozǵaldy. Bul týraly jýrnalist Mihail Kozachkov habarlady, dep habarlaidy Dalanews.kz.
Bul joly Qarjylyq monitoring agenttigi erekshe balany tárbielep otyrǵan erli-zaiyptyǵa nazar aýdarǵan. Balaǵa em qajet bolyp, qarajat jinaý bastalǵan. Alaida adamdar kómektesip, qajetti soma jinalǵannan keiin de, erli-zaiypty toqtamaǵan.
Kozachkovtyń málimetinshe, Dáýlet pen Tolqyn Totaqanovtardyń otbasynda 6 jyldan astam ýaqyt buryn Altair esimdi ul dúniege kelgen. Kóp uzamai ata-anasy onyń damýynda tejelis baryn, óz betinshe otyrmaitynyn, júre almaitynyn jáne tamaq ishe almaitynyn ańǵarǵan.
Balany túrli dárigerler men reabilitologtarǵa kórsetken. Sońynda Túrkiiada 50 mln teńgege ota jasaýǵa daiyn mamandar tabylǵan.
Dál osy somany jinaý úshin otbasy Instagram jelisinde qarajat jinaýǵa kirisken. Qazaqstandyqtar balanyń shyn máninde emge muqtaj ekenin kórip, qajetti somany jinap bergen.
Alaida belgisiz sebeppen erli-zaiypty qaiyrymdylyqty toqtatpai, jarnamaǵa qaita qarjy salyp, nátijesinde aýdarymdar kólemi odan ári artqan.
Olar osylaisha jumys istegen – túsken qarajattyń bir bóligin jarnamaǵa jumsap, qalǵanyn ózderine qaldyrǵan. Qarjylyq monitoring agenttiginiń esebinshe, tórt jyl ishinde Altairdiń emine 350 myńnan astam adam qarajat aýdarǵan, al jalpy jinalǵan soma 1,3 milliard teńgeden asqan.
Onyń ishinde Totaqanovtar jarnamaǵa shamamen 300-400 million teńge jumsaǵan, al tergeý dereginshe, balanyń emine nebári 6 million teńgeden sál asa qarajat ketken. Qalǵan aqsha jyljymaityn múlik, kólik, sheteldik saparlar, qumar oiyndar men basqa da kóńil kóterýge baǵyttalǵan.
Jýyrda Dáýlet pen Tolqyn Totaqanovtardyń isi sotqa jetti – olar alaiaqtyq jasady jáne qylmystyq jolmen alynǵan aqsha men múlikti zańdastyrdy degen aiyppen sotqa tartylyp otyr.
