استانادا قايىرىمدىلىققا قاتىستى تاعى ءبىر داۋلى قىلمىستىق ءىس قوزعالدى. بۇل تۋرالى جۋرناليست ميحايل كوزاچكوۆ حابارلادى، دەپ حابارلايدى Dalanews.kz.
بۇل جولى قارجىلىق مونيتورينگ اگەنتتىگى ەرەكشە بالانى تاربيەلەپ وتىرعان ەرلى-زايىپتىعا نازار اۋدارعان. بالاعا ەم قاجەت بولىپ، قاراجات جيناۋ باستالعان. الايدا ادامدار كومەكتەسىپ، قاجەتتى سوما جينالعاننان كەيىن دە، ەرلى-زايىپتى توقتاماعان.
كوزاچكوۆتىڭ مالىمەتىنشە، داۋلەت پەن تولقىن توتاقانوۆتاردىڭ وتباسىندا 6 جىلدان استام ۋاقىت بۇرىن التاير ەسىمدى ۇل دۇنيەگە كەلگەن. كوپ ۇزاماي اتا-اناسى ونىڭ دامۋىندا تەجەلىس بارىن، ءوز بەتىنشە وتىرمايتىنىن، جۇرە المايتىنىن جانە تاماق ىشە المايتىنىن اڭعارعان.
بالانى ءتۇرلى دارىگەرلەر مەن رەابيليتولوگتارعا كورسەتكەن. سوڭىندا تۇركيادا 50 ملن تەڭگەگە وتا جاساۋعا دايىن ماماندار تابىلعان.
ءدال وسى سومانى جيناۋ ءۇشىن وتباسى Instagram جەلىسىندە قاراجات جيناۋعا كىرىسكەن. قازاقستاندىقتار بالانىڭ شىن مانىندە ەمگە مۇقتاج ەكەنىن كورىپ، قاجەتتى سومانى جيناپ بەرگەن.
الايدا بەلگىسىز سەبەپپەن ەرلى-زايىپتى قايىرىمدىلىقتى توقتاتپاي، جارناماعا قايتا قارجى سالىپ، ناتيجەسىندە اۋدارىمدار كولەمى ودان ءارى ارتقان.
ولار وسىلايشا جۇمىس ىستەگەن – تۇسكەن قاراجاتتىڭ ءبىر بولىگىن جارناماعا جۇمساپ، قالعانىن وزدەرىنە قالدىرعان. قارجىلىق مونيتورينگ اگەنتتىگىنىڭ ەسەبىنشە، ءتورت جىل ىشىندە ءالتايردىڭ ەمىنە 350 مىڭنان استام ادام قاراجات اۋدارعان، ال جالپى جينالعان سوما 1،3 ميلليارد تەڭگەدەن اسقان.
ونىڭ ىشىندە توتاقانوۆتار جارناماعا شامامەن 300-400 ميلليون تەڭگە جۇمساعان، ال تەرگەۋ دەرەگىنشە، بالانىڭ ەمىنە نەبارى 6 ميلليون تەڭگەدەن ءسال اسا قاراجات كەتكەن. قالعان اقشا جىلجىمايتىن مۇلىك، كولىك، شەتەلدىك ساپارلار، قۇمار ويىندار مەن باسقا دا كوڭىل كوتەرۋگە باعىتتالعان.
جۋىردا داۋلەت پەن تولقىن توتاقانوۆتاردىڭ ءىسى سوتقا جەتتى – ولار الاياقتىق جاسادى جانە قىلمىستىق جولمەن الىنعان اقشا مەن مۇلىكتى زاڭداستىردى دەگەن ايىپپەن سوتقا تارتىلىپ وتىر.
